Parlamentario Arthur Dowers: Hende mescos cu naturalesa ta blanco di atake y persecucion di partido MEP

Esey ta e conclusion cu ex minister di husticia y actual parlamentario di Partido di Pueblo Arubano AVP a yega na dje y cu a comparti cu medio local di comunicacion for di e rotonde di driekiel na Eagle Beach diaranson mainta.

E atake contra nos yiu di tera cu Dowers ta papia di e dje ta e persecucion politico riba Nigel Maduro, activista ambiental. T’asina cu for di oficina di e minister di husticia lo a sali un yamada pa autoridadnan policial y hudicial pa duna prioridad na su detencion y caso penal.

Dowers: “AVP ta lamenta profundamente cu ta maluza husticia continuamente pa persecucion politico. Ta hopi importante pa realisa cu e persecucion aki a inicia y haya forsa basa riba e echo cu a sospecha cu e persona envolvi ta famia di un politico di partido AVP.”

Den henter reino Hulandes por a mira diferente protesta tuma luga; y ora cu cos ta bay fo’i man, naturalmente husticia mester interveni. Sinembargo, e acto di pinta algo riba un muraya no ta hustifica e detencion y prioridad cu a duna na e caso en particular aki.

Mientrastanto a pospone hopi otro caso, hera di mas peso e importancia. Despues di tempo, Hues ta hay’e ta reduci e sentencia door di e tardansa. “Tres dia m’a compronde e persona aki a keda den cel. El a haya menos ora di castigo cu el a pasa deteni den warda. Cos ridiculo cu ta pasa na e pais aki,” Dowers a declara.

Y aunke Minister Tjon a nenga cu ta for di su oficina a pone presion riba autoridad, su record ta mustra cu den pasado caba el a haci mal uzo di su posicion como miembro di Parlamento pa bay cerca procurador general y un investigacion riba un contrincante politico. Mas despues si e no tabata dispuesto mas pa entrega autonomia hudicial di Aruba, pa asina evita investigacion den direccion di su partido.

“E driekiel cu mester a bira un simbolo cu ta motiva e proteccion di naturalesa, awo ta un simbolo cu ta recorda nos tur cu mester proteha tambe ser humano for di persecucion politico di partido MEP. Nan ta abusa di e poder cu a haya fia for di pueblo,” Dowers a bisa recordando cu e propio Evelyn Wever-Croes y su coleganan di partido a grita dilanti di parlamento cu si ta necesario nan lo kima parlamento y agredi polis; mesun accion cu awor ta persigui Maduro p’e, pero pasobra e lo ta famia di un politico di oposicion.

Parlamentario Dowers a conclui su declaracion door di urgi e pueblo di Aruba pa no Laga permiti MEP bin atrobe y purba di tira santo den nos wowo. Ta bisto cu MEP ta un partido cu ta simbolisa pa inhusticia, pa trapa e derecho di hende y pa abuso di poder.