Minister Xiomara Maduro a bishita Prinses Amalia Basisschool

E siman di bishita escolar tabata un exito

Na final di e siman di bishitanan escolar, Minister Xiomara Maduro di Cultura a bishita Prinses Amalia Basisschool pa asina presencia nan celebracion di Himno y Bandera y alabes combersa cu e muchanan tocante e dia aki y e importancia di celebr’e.

Durante henter e siman, Minister Maduro a tene charla cu diferente klas di e scolnan cu ela bishita. E focus di su charla tabata pa inculca e sentido di orguyo den nos muchanan pa asina nan por sinti nan mes orguyoso di nos Pais. Locual a resalta di e charla di e mandatario y locual cu ela pone enfasis riba dje ta cu loke cu ta haci Aruba asina unico y special ta nada mas y nada menos cu nos mesun hendenan. Sea naci na Aruba of cu nan a bin for di otro Pais y haci Aruba nan hogar, ta nos dushi hendenan ta haci nos Pais locual cu e ta.

Minister Maduro ta mira bek na un siman exitoso unda cu tur scol a duna un toke special na e celebracion di Dia di Himno y Bandera. E mandatario ta gradici cabesante, cabesante suplente, staff y personal di Prinses Amalia Basisschool pa e bunita recepcion y alabes ta gradici tur mucha cu a duna e mandatario un caluroso bonbini na nan scol. Cultura bo tin cu bib’e y cu bo participacion bo ta engrandece.