Frase historico na maart 1983: De kogel is door de kerk!
Awe MEP ta recorda cu 39 aña pasa e Conferencia di Mesa Rondo a finalisa, caminda Aruba a logra su Status Aparte

Awe 12 maart ta recorda cu 39 aña pasa a finalisa e Conferencia di Mesa Rondo na Den Haag y cual conferencia a inicia dia 7 di maart 1983. Tabata exactamente 39 aña pasa cu bao guia di awe den feliz memoria nos Libertador Betico Croes y e delegacion Arubano a logra corona cu exito e lucha ferviente di nos pueblo pa su Status Aparte. Esaki despues cu nos Libertador a guia e comision pa prepara nos structura estatal den Parlamento, unda tur partido politico y gremio den nos comunidad tabatin e oportunidad pa dialoga riba e futuro estatal di nos isla.

Aceleracion di e lucha
Aruba a inicia e proceso na un manera acelera desde 9 di februari 1971, fecha cu a funda e partido Movimiento Electoral di Pueblo (M.E.P.), cu e meta primordial pa realisa e anhelo di nos pueblo. E proceso tabata uno hopi dificil, cu hopi discusion cu gobierno Antiyano y politiconan Hulandes. Den Eilandsraad di Aruba e comision pa prepara nos structura estatal a acepta dia 24 januari y 24 di februari 1983, mocionnan pa manda un delegacion, cu e instruccionnan necesario y cu un gran cantidad di condicion pa bay negocia na e Conferencia di Mesa Rondo na Den Haag, Hulanda, di dia 7 pa 12 di maart 1983. Nos pais tabata representa pa tur e partidonan politico, gremionan comercial, sindical y clero. Esaki ta mustra un biaha mas e gran sentido di democracia y union cu a biba bao di Betico Croes y su partido MEP.

Logronan di Conferencia di Mesa Rondo
Locual nos a logra exactamente 39 aña pasa ta encera entre otro lo siguiente:

1. Saliendo for di e derecho di autodeterminacion di cada un di e islanan, e conferencia ta acepta e resolucion di Aruba pa haci uso awor di su derecho di autodeterminacion, door di scoge definitivamente pa independencia, cu mester wordo realiza na aña 1996. E status aki tin duracion di 10 aña y lo principia dia 1 di januari 1986;
2. Prome cu 1996 lo wordo teni un conferencia di evaluacion entre Reino y Aruba, pa eventualmente examina e fecha di independencia di Aruba, den luz di evolucionnan estatal entre e paisnan di Reino;
3. Aruba ta desea, una vez independiente, keda coopera cu Reino den un relacion di Mancomunidad sui generis riba e siguiente terenonan: cooperacion den asuntonan di desaroyo, cooperacion cultural, educacional, hudicial, y Reino ta garantisa nos relacionnan exterior y e defensa di nos integridad teritorial.
   Na final di e conferencia aki ex-Premier Lubbers di Hulanda a declara e frase historico: ‘De kogel is door de kerk’: Aruba a logra su Status Aparte, danki na e lucha, sacrificio, curashi y determinacion desplega pa su lider inmortal Betico Croes. E acuerdo historico a ser firma pa Premier di Hulanda Ruud Lubbers, Premier di Antiyas Don Martina y e lider estadista Arubano Betico Croes.

Coordinacion Status Aparte
Durante e periodo di 1983 pa 1985 hopi preparacion, trabao y esfuerso a ser haci pa ehecuta e resultadonan di e Conferencia di Mesa Rondo, caminda a nombra sr. Nelson Oduber como coordinador di henter e proyecto. Masha hopi ley mester a ser prepara. Mester a prepara e Constitucion di nos pais, un forma nobo di cooperacion cu gobierno di Antiyas, stipula cual ta e leynan cu nos lo tuma over di Antiyas, con lo separa bienes, con lo introduci nos propio Parlamento, Gobierno, Banco Central, nos Florin, con lo bin cu un propio Corte di Husticia, Ministerio Publico, Procurador General, Raad van Advies, Algemene Rekenkamer, Gobernador, propio Cuerpo Policial, con lo tuma tur e Landsambtenaren cu ta traha na Aruba etc. Banda di tur esaki nos mester a bin tambe cu nos propio Fondo di Pensioen y Banco di Aseguro Social. E proceso aki sr. Oduber a guia durante dos aña largo, dia y anochi, pa por a bin cla cu e trabaonan dia 31 di december 1985 y pa asina entrante prome di januari 1986 nos drenta Status Aparte.

Scrapmento di e fecha di Independencia
Despues cu Gabinete Eman 1 no a haci net nada riba tereno estatal durante 1986-1988, tabata hustamente sr. Nel Oduber como Prome Minister dia 13 di juli 1990 a yega na un acuerdo historico cu e Prome Ministro di Hulanda Ruud Lubbers y Ministro di Asuntonan Antiyano y Arubano Ernst Hirsch Ballin pa saca e fecha di Independencia 1996 for di Statuut, pero a percura pa mantene e derecho pa algun dia e pueblo mes – mediante un Referendum y 2/3 parti den Parlamento – dicidi riba su propio destino estatal, sin cu tin mester di aprobacion di Antiyas of Hulanda. A yega na e acuerdo aki ya cu Gobierno di Hulanda mes a hala atras y no kier a duna e garantianan acorda den e 33 puntonan di e Conferencia di Mesa Rondo.
Si nos mira nos pais awe, despues di 39 aña di e Conferencia di Mesa Rondo, nos ta desea di expresa palabranan di gratitud, aprecio y admiracion pa tur esnan cu tabata tin e curashi pa lucha y realisa e deseo di nos pueblo y en especial nos Libertador Betico Croes. Laga e dia di awe ta un dia di reflexion, caminda un y tur realisa cu nos Status Aparte no ta algo cu a cay for di cielo, pero cu esaki a ser logra a base di sanger, sodo y lagrima.