Minister Dijkgraaf riba mision di conocemento na Aruba y Corsou

Robbert Dijkgraaf, minister di Enseñansa, Cultura y Ciencia, lo ta na Aruba y Corsou for di 8 te cu 12 di april pa dirigi un mision di conocemento. Hunto cu institutonan di enseñansa, Dijkgraaf ta desea reforsa e colaboracion riba tereno di enseñansa y investigacion entre Hulanda, e paisnan den Reino y Hulanda Caribense. Tambe un consientisacion mas grandi di e impacto di pasado di sclavitud ta keda central.

Dijkgraaf: “Mi ta ansioso pa profundisa y expande e colaboracion riba tereno di enseñansa y ciencia. Colaboracion intensivo cu parti Caribense di Reino, cu tin lasonan historico profundo cu nos, ta esencial. Afortunadamente, tin hopi impulso den nos relacion riba tereno di enseñansa. Durante e añanan cu a pasa nos a logra pasa aden cu bon desaroyonan, cu iniciativanan bunita manera e Beca di Reino. Awor ta cuestion di continua cu esaki. Ta importante tambe pa presta atencion na e pasado di sclavitud. Pa motibo cu esaki ta sigui afecta henter comunidad. E aña di conmemoracion ta causa mas conscientisacion tocante esaki.”

Mihor coneccion cu mercado laboral

E mision di conocemento ta consisti di dirigentenan di dies instituto di mbo, hbo y universidad, y di representantenan di NWO, KNAW y De Jonge Akademie. Hunto cu nan, Dijkgraaf ta bishita Aruba prome. Aki e enfoce ta riba coneccion di enseñansa cu mercado laboral: e situacion actual, pero mas cu ainda con e oferta di enseñansa por conecta mihor cu e necesidadnan di e mercado laboral.

Tambe na Aruba ta papia cu expertonan tocante enseñansa permanente (di largo bida) i enseñansa adicional. Ki forma di enseñansa por wordu uza pa esaki? Aki tur sector (mbo, hbo, wo) ta wordu involucra.

Finalmente, e tema di mobilidad di studiante ta bini dilanti: asina studiantenan cu a haci uzo di e beca di Reino nobo durante e prome ronda ta comparti nan experiencianan. For di e aña academico benidero lo tin cupo pa 120 studiante pa aña haci un intercambio of core stage den Reino cu e beca aki, cu ta destina pa aumenta intercambio cortico di studiante. E aña academico aki un total di 25 studiante ya a haci uzo di e beca.

E impacto di pasado di sclavitud

E pasado di sclavitud ainda ta laga su rastronan atras ora ta trata di enseñansa y investigacion. Hopi studiante Caribense ta keda atras, un punto cu ta keda bini dilanti ta e transicion dificil pa un estudio na Hulanda. Bou guia di universidadnan Caribense, durante un sesion di tema ta para keto na e impacto di e pasado di sclavitud. Meta ta pa crea mas comprencion y conocemento tocante e pasado di sclavitud.

Declaracion di intencion pa colaboracion di institutonan

Na Corsou institutonan di enseñansa for di Hulanda y e islanan ta traha na un declaracion di intencion. Hunto nan kier bay explora ki colaboracionnan ta posibel dentro di Reino. Esaki mester conduci na un acuerdo mas detaya.

Banda di enseñansa na Corsou, tambe lo trata investigacion y ciencia. KNAW, NWO, De Jonge Akademie y investigadornan for di parti Caribense di Reino ta busca aporte pa un agenda di conocemento, pa asina stimula e posibilidadnan di investigacion riba topiconan actual den comunidad di e islanan Caribense. Ta papia tocante intensificacion di colaboracion riba tereno di investigacion cu e parti Caribense di Reino, y eventual financiamento.

Durante e sesion ta considera tambe e bareranan cu postdocs, studiante di master y doctorando ta experiencia, manera acceso na financiamento di investigacion.

NWO actualmente ta trahando riba posibilidad pa proyectonan cortico, impulsa pa curiosidad. Tambe e experiencianan di hoben investigador Caribense ta keda enfatisa. Nan ta participa den desaroyo di posibilidadnan financiero pa investigacion doctoral dentro di e programa ‘Investigacion Caribense’.

Aumenta exito di estudio

E mision di conocemento ta caba cu e conferencia di trabou di SEA (Strategic Education Alliance). E plataforma di e cuater paisnan di Reino tin como meta aumenta exito di estudio y igualdad di oportunidad pa studiantenan Caribense. Durante e conferencia studiantenan for di Caribe lo tin oportunidad pa vocifera entre otro, preguntanan manera con enseñansa na e islanan por conecta mas mihor cu enseñansa avansa.

E mision di conocemento pa region Caribense ta e di tres despues di misionnan anterior pa Indonesia y Sur-Afrika. E bishitanan aki a reforsa e colaboracion bilateral cu e paisnan conserni y entre institutonan di enseñansa y conocemento.