Partido AVP: Falta di vision di MEP a laga un bon scol converti den menasa social pa San Nicolas

Fuera di a haci reparacion necesario na e Parke di Lago Heights, algun candidato di AVP di San Nicolas hunto cu Parlamentario ing. Mike de Meza a trece dilanti otro ehempel di con e districto ta sufri na man di e falta di atencion y vision di e gobierno actual. For di e ruinanan di Scol Don Bosco pariba di Joe Laveist Sport Park, a mustra con loke un tempo tabata un bon scol, awendia ta representa un menasa social pa e comunidad.

De Meza a recorda con despues di a cera den decada 70, e edificio a bira sede di e prome Colegio Arubano na San Nicolas. Na 2009 Gabinete Mike Eman I, a traves di ex minister di enseñansa, mr. Arthur Dowers, a drecha full e scol den un joya di edificio cu un funcion nobo.

Sinembargo, ora cu gobierno di MEP/POR/RED a haci su entrada na 2017, no a haci nada mas cu ne. “Ta p’esey e gobierno aki ta conoci pa ta esun cu ta cera scol na San Nicolas. Tanto uzo cu por a haya, awe ta un ruina y tristeza,” asina e parlamentario di AVP a expresa. “Na luga cu parlamentario di MEP Hendrik Tevreden ta preocupa su mes si Mike de Meza ta subi lista atrobe of no, e mester ta preocupa cu e edificio y muchanan di San Nicolas cu no ta haya debido atencion e importancia.”

Candidato Conny Connor, kende ta un maestro di profesion, ta mira e ruinanan di Scol Don Bosco como un refleho di e falta di vision di e gobierno actual. Ta dolor pa mira un edificio cu por a sirbi pa deporte, pa ensenansa, pero cu deliberadamente a opta pa lag’e bay perdi. Segun Connor, “e perdida ta pa abo, ami y nos tur. Y e mesun cos ta sosodiendo rond henter Aruba, pero particularmente na San Nicolas.”

Mientrastanto, candidato Otami Thomasia ta un docente cu a duna les tempo cu e scol tabata den funcion. E ta kere cu Gabinete Wever-Croes a lubida e motibo pakico nan ta caminda nan ta. “Si ta falta di idea y vision nan tin, nan por bin papia cu e pueblo di San Nicolas pa tende kico tur nan tin mester,” Thomasia a laga sa.

For di e angulo di un ex studiante, tambe di Scol Don Bosco, Terrence Ras ta recorda e bon condicion cu e scol tabata aden. Awendia, como adulto, e ta  mira con e ruinanan aki, obviamente frecuente pa adicto ambulante y otro antisocial, ta entre St. Augustinus School y Paulus School y e ta preocupa cu gobierno a crea un luga caminda facilmente un hende cu menos bon tin intencion por haci malo na e muchanan di e area.

Aunke e peticion di AVP na Gabinete Wever-Croes II pa drecha Parke Lago Heights no a haya oido, ta spera cu e biaha aki si coalicion MEP/RAIZ por pone man na curason y haci algo na beneficio di e pueblo di San Nicolas y su siguridad.