Discurso di Minister Maduro na despedida di Joannes DonatI: E Pintor y MUSICO Arubano

Recientemente a bay laga nos Joannes Donati. Durante e ceremonia di despedida Minister di Cultura Xiomara Maduro a hiba palabra. E mandatario a repasa en breve e trayectoria artistico di Joannes Donata, cariñosamente yama Janchi, Bubu of simplemente Donati pa su famia, amigo y conocirnan. Donati a nace na Cadushi Largo, Santa Cruz dia 14 di mei 1931. Su mayornan tawata yama: Jasinto Donati (Chinto) y Armónica Geerman (Monca), un famia humilde cu a haya diez yui, Joannes tabata e di dos.  

Su mayornan a biba e realidad duro cu nos isla a conoce na cuminsamento di Siglo 20, ora hopi Arubiano mester a bandona nos isla pa bay traha afo. Su Tata Chinto, como hoben di 16 aña, a bay traha na Santa Marta, Colombia y a biba un tempo aya. Su Mama, Monca, como mucha di mas o menos nuebe aña a bay biba na Cuba hunto cu su mayornan y su rumannan, ya cu aya tawata tin trabao. Su mayornan a conoce otro na Corsou y na final di 1928 a regresa Aruba, unda cu su Tata a haya trabou na Refineria Lago. 

Joannes ta un descendiente directo di e mescla historico cu a tuma luga riba nos isla entre e Indjan-Mestizo, e catibo y e Europeo. Por bisa cu mas o menos cu 13 aña e no a bay scol mas, y a cuminsa traha como “Butcher Apprentice” na mercado (Marshe), yama Plaza den boca di pueblo na San Nicolas (actual Brandweer y warda di Polis San Nicolas). Cu 14 aña el a traha como metsla, corta aloë y a baha carga for di Barco na Waf na Playa. Cu 16 aña el a biaha pa nos hermana Isla Corsou cu un pasashi di 15 florin riba Barco di Bela. Cu 19 aña el a traha na Lago y despues el a drenta cu 33 aña den e mundo di cushinamento. Na ultimo Joannes a habri e restaurant Taurus (Cas di Toro). Na 1985 na e edad di 54 aña el a bay biba na Hulanda pa motibonan familiar y personal.

Joannes…  E Pintor

Joannes su curiosidad y interes den pintamento a bin for di su infancia, su prome buki di pintamento ta cumpra na Libreria Red Store na San Nicolas. E prome cara cu el a pinta ta di su primo Vicente “Chento” Maduro. Joannes a tuma cursonan internacional via corespondecia cu un scol na Merca. Na 1972 el a gana e prome premio den e concurso ”Exposicion di Arte Popular” na Sociedad Bolivariana cu su obra titula “The Naked Justice”. Dia 23 di october 1981 e tabata tin su prome exposicion den Cas di Cultura. Na 1983 Donati a entrega na Consehero General di Gobierno e tempo ey, Betico Croes, e obra: “Libertad di un pueblo” cu ta refleha e sucesonan di 24 di april 1983. Tambe el a dedica un cuadro na e lucha pa nos Status Aparte, “Lucha pa nos Libertad” y dos otro cuadro di Betico Croes, e miho politico cu el a conoce.

Na 2002 den 30 artista, e cuadra di Donati titula “Boca Prins” a keda escohi pa Gobierno di Aruba pa regala e Pareha Real, recien casa, Prins Willem Alexander y Princes Maxima. Esaki tawata Aruba su regalo di bruid na e Pareha Real. Awendia e cuadra por ser admira den Paleis Soestdijk na Den Haag.

Exposicionnan caminda el a expone su cuadranan ta na:

• Cas di Aruba bau auspicio di Kabinet van de Gevolmachtigde Minister van Aruba na 1994 na Hulanda;
• Biblioteca Nacional na 2000;
• Instituto di Cultura na 2005;
• Access Art gallery na 2008;
• National Art Exhibit na 2009
• 2011 Departamento di Cultura a dun’e un homenahe di sorpresa cu un exposicion parcial di su pinturanan conhuntamente cu un celebracion en grande di su 80 aña hunto cu su famia, amigo, conocinan, como tambe invitadonan prominete den e mundo cultural.

Joannes… E musico

Ademas di ta pintor, por bisa tambe cu Joannes na su manera a destaca riba e tereno di musica. El a composita cantica riba guitara y a scirbi poesia. Mescos cu su pinturanan, nunca el a tene un registro di tur su composicionnan. Diferente persona a canta of graba varios di su composicionnan, manera Lidwina Booi, Vito Koolman, Chito de Cuba y José Girón.

Pa e Festival di Himno y Bandera, tin hende tawata acerca Joannes pa e composita un cantica, pa asina nan por participa na e festival. Su prome cantica composita pa e Festival di Himno y Bandera tawata pa Brigitte Croes na aña 1999, cu e titulo “Na canto di caminda”. Brigitte Croes a participa tambe na e Festival di Himno y Bandera cu otro composicionnan di Joannes, manera “Honor y Gloria”, “Reina Caribense” y “Lamento Arubiano”. Otro personanan cu a participa na e Festival di Himno y Bandera cu composicion di Joannes ta entre otro Bertha Wolff cu e cantica “Ya e no t’ey mas” y Ruth Gravenhorst cu e cantica “Orguyo di Nos Pais”.

Sea su pintura, cantica of poesia, un gran parti di Joannes su identidad como Arubano y su amor pa su isla natal ta resalta. Pa finalisa como pintor nos por bisa cu:

Su dicho lo keda graba pa semper: “Ora cu bo pinta, e sentimento y e calor cu ta sali for di e pintura, esey ta dibo!”. Cu Joannes, e pintor Arubano, keda pinta paisahenan di nos dushi Aruba den cielo cerca di nos Señor. Cumpliendo cu e deseo di Joannes Donati, durante e ceremonia di despedida, e bandera di nos Pais Aruba tabata poni riba e caha di Sr. Donati, cual na final di su discurso Minister di Cultura a entrega na su famia, esposa y yiunan.

Palabra di consuelo

Por ultimo Minister Maduro a expresa palabra di forsa y consuelo na su kerida esposa Catharina, yiunan Shirley, Sherwin y Joanne. Tambe, Mayra, Reggie, Magalie, Jessica, Debbie, Janina y Gianna cu el a stima manera su propio yiu. Y su nietonan, bisanietonan y demas famia cu el a stima. Cu Joannes Donati sosega na paz.