Partido MEP: PARLAMENTARIO GERLIEN CROES MESTER BAY CUESTIONA MIKE EMAN Y BENNY SEVINGER!

Y en bes di ataca Gobierno, bin para na banda di Gobierno den busca solucion pa un problema cu e ta co-responsabel p’e

Partido MEP a tuma nota di un comunicado recien di Parlamentario Gerlien Croes na unda cu el a cuestiona tocante principalmente e 1900 camber di hotel extra cu lo bin na Aruba. Y tambe e parlamentario a mustra hopi preocupacion ken mester wordo teni responsabel pa e maneho pa permiti tanto camber asina na Aruba.

Teniendo cuenta cu Gerlien Croes ta bin di Partido AVP, y tawata parlamentario di AVP e tempo cu e permisonan pa cambernan di hotal a wordo otorga, por conclui cu Gerlien Croes mester wordo teni responsabel pa esaki hunto cu e partido di cua e tawata forma parti e tempo ey. Por lo tanto, Gerlien Croes mester cuminsa pa cuestiona su mes, su ex-lider Mike Eman, y su ex-colega Benny Sevinger.

Pa cuminsa, tempo cu Gabinete Wever-Croes a drenta Gobierno, a encontra compromisonan haci pa e gobierno anterior, pa construccion di un total di 7000 camber di hotel nobo na Aruba, incluyendo Iberostar. Esaki cu aprobacion di Gerlien Croes. Gerlien Croes a bay di acuerdo pa su gobierno otorga permisonan pa contrui, no 1900, sino 7000 camber nobo di hotel. Por lo tanto Gerlien Croes tambe ta responsabel di e maneho malo aki di su ex-partido politico.

Gabinete Wever-Croes, un gobierno responsabel y cu vision, mirando cu e cantidad aki ta hopi halto, y pais Aruba no lo por carg’e, a cuminsa cu negociacionnan pa purba na reduci esaki. Algun hotel a bay di acuerdo pero otronan a nenga, di cual ainda e casonan ey ta den corte. Actualmente, gobierno a logra reduci e cantidad na 2000 camber, 5100 camber menos, y lo sigui cu negociacionan pa baha esaki ainda mas. Den esaki si, no a conta cu ni aprobacion ni elogio di Gerlien Croes, por lo tanto, e no por wordo tuma responsabel di e bon maneho di Gabinete Wever-Croes.

Gerlien Croes a menciona cu e ta preocupa tambe cu RWZI. Pero tempo cu el a aproba 7000 camber nobo, RWZI ya caba tawata un reto grandi. Pero, Gerlien Croes e tempo ey no a preocupa cu esaki. E no a mira mas leu con 7000 camber lo afecta RWZI. Gabinete Wever-Croes ta busca y haya solucion pa RWZI y den esaki e 1900 tambe ta inclui.

Un cos sigur ta, un parlamentario mester cumpli cu su trabou y cuestiona. Pero den e caso aki, ta bon pa Gerlien Croes cuminsa cuestiona su mes na prome luga, despues e cuestiona su ex-lider, señor Mike Eman y su ex-colega di partido, señor Benny Sevinger, kendenan, cu aprobacion y elogio di Gerlien Croes, a duna permisonan pa construi no 1900 camber extra, sino 7000 camber extra. Gerlien Croes ta co-responsabel den e maneho aki y tur otro maneho cu a hiba Aruba den mal direccion, pasobra e a yuda AVP bin na mando pa masacra e pais aki.

Partido MEP ta conseha Gerlien Croes pa enbes di ataca Gobierno cu ta trahando pa coregi su erornan y erornan di su ex partido politico, pa para banda di gobierno den busca solucion pa un problema cu e ta co-responsabel p’e!