Ministerio di Husticia y Asuntonan Social: LUNA NACIONAL DI CONSCIENTISACION CONTRA ABUSO DI MUCHA: CONSCIENTISACION TA IMPORTANTE DEN COMBATIMENTO
ORANJESTAD – Diabierna ultimo, en conexion cu Luna Nacional di Conscientisacion Contra Abuso di Mucha Minister di Husticia y Asuntonan Social sr. Rocco Tjon, conhuntamente cu demas ministernan y parlamentarionan a sende e luz blauw como gesto simbolico di e compromiso cu Gobierno di Aruba tin pa cu e lucha aki contra abuso di mucha.
Gobierno di Aruba tin como compromiso pa salvaguardia e bienestar y e futuro di nos muchanan. Un compromiso cu ambos Gabinete Wever-Croes I y II a bin ta traha hopi duro riba dje. Na aña 2020 cierto cambionan den ley a tuma luga, pa asina aumenta e castigo pa e tipo di delitonan aki, cambio den maneho tambe a tuma luga, di cual awe nos ta conoce ‘richtlijnen’ cu Ministerio Publico ta uza, ora ta trata delitonan di abuso sexual.
Banda di esaki, a introduci tambe diferente metodonan di trabou pa asina por salvaguardia e bienestar di nos muchanan mucho mas miho. Asina por menciona cu a conoce introduccion di e metodonan di ‘signs of safety’ y ‘codigo di proteccion’. Ademas, mas recien un cantidad halto di profesionalnan a gradua den e metodo di ‘multi-dimensioneel familie therapie’. Pues, ta trata di metodonan cu ta bay percura pa detecta señalnan di abuso di mucha mucho mas trempan, pa asina por brinda guia y sosten pero tambe pa por investiga e tipo di casonan aki mucho mas eficiente.
Tambe, tin introduccion di institutonan nobo, como tambe funcionarionan nobo manera medico forensico, y na luna di Juni binidero tur cos lo culmina cu e inauguracion di e Family Justice Center. Family Justice Center ta destina pa Jeugd en Zeden Politie hunto cu Bureau Slachtoffer Hulp y Mediconan Forensico, pa di e forma aki por investiga e tipo di casonan aki mucho mas miho, y asina presenta un caso mucho mas solido dilanti huez, pa asina e castigo por wordo duna. Banda di esaki e guia y sosten pa e victima tambe ta hopi importante, pues tambe ta wordo teni den consideracion.
Crea conscientisacion ta importante, pa cual a decreta luna di april como luna di conscientisacion nacional contra abuso di mucha. Crea conscientisacion ta un stap importante pa contraaresta abuso di mucha. Durante henter luna di april tin diferente charlanan andando di diferente organisacionnan, un esfuerso colectivo di henter nos comunidad conhuntamente cu Gobierno di Aruba.
Diabierna, Gobierno a ilumina Bestuurskantoor na color blauw, como gesto simbolico di e compromiso cu Gobierno di Aruba tin pa cu e lucha aki. Cada un di nos tin e responsabilidad pa mobilisa accion contra e crimen di abuso di mucha. Comision nacional contra abuso di menor, fundacion respetami, organisacionnan gubernamental como tambe no-gubernamental y comunidad di Aruba henter, a renoba e compromiso cu nos muchanan. Colectivamente ta e herment di mas fuerte pa combati abuso di mucha.
Por ultimo, minister Tjon a gradici tur profesional cu dia aden y dia afo ta traha hopi duro y hopi biaha e esfuerso no ta wordo mira ni aprecia, pero esaki sigur no ta en vano, cada esfuerso ta wordo aprecia enormemente den e lucha contra di abuso di mucha.
