Ryçond do Nascimento: Patrick Paskel su impotencia periodistico

Siman pasa Patrick Paskel tawata hopi rabia cu mi, pasobra e ta sinti cu e ta e Goliat di prensa y ningun hende tin nada di bis’e. Hustamente e arogancia ey ta pon’e sinti cu e ta mas cu Edmond Croes of Karel Arends. Pero na mes momento e arogancia ta hib’e na mustra su falta di etica periodistico y capacidad intelectual. Pasobra, den su rabia y su impotencia pa reacciona riba contenido, el a confirma na henter su audiencia cu e t’ey pa manipula informacion pa AVP. Como cu mi a bin ta desenmascara e agenda criminal di AVP, ami a bira e David cu Patrick kier mata. Den esey el a hinca den su cabes cu Karel Arends ta e arma pa afecta ami. Pero, ni maske cuanto Patrick purba cambia mi rumbo, mi lucha ta keda contra e corupcion cu aparentamente e kier defende.

Patrick kier haci yen curso con pa manipula su audiencia. Pero e no kier siña encuanto periodismo di calidad y e codigo di etica periodistico di e “Global Charter of Ethics for Journalists”. Si Parick tin speransa pa un dia bira un periodista serio, e mester cuminsa bisti su bril di lesa pa wak bon kico hues ta bisa den e sentencia di Benny den paragrafo 9, alinea 4 en adelante (yena “ECLI:NL:OGEAA:2023:7” riba rechtspraak.nl).

Hues ta cuminsa na splica cu el a keda proba legalmente y di forma convincente cu ex-minister Benny Sevinger ta culpabel di soborno pasivo, pasobra Benny a acepta regalo bao mesa pa regala patrimonio di pueblo. Hues tambe a menciona e tres persona cu a duna Benny regalo bao mesa. Despues di esey hues ta duna un tiki atencion na loke a pasa cu e fundacion politico di Benny, bisando cu Benny tambe ta culpabel de malversacion di un suma di Afl. 11.375,50. Benny a saca e suma aki di su fundacion politico y a uz’e pa asuntonan priva.

Siguientemente hues a motiva e gravedad di e accionnan di ex-ministro Benny Sevinger. Hues ta splica cu ora Benny Sevinger a ricibi placa bao mesa pa regala patrimonio di pueblo, Benny a traiciona y a mina gravemente e confianza di pueblo den gobierno. Hues ta sigui splica cu e corupcion di Benny ta daña e imagen di pais Aruba y cu e crimennan di Benny por tin un efecto economico negativo. Asina e crimennan cu Benny Sevinger a comete durante su ministerio y den su capacidad di minister ta mina henter nos sociedad. Hues ta sigui mustra cu no solamente Benny a abusa di su funcion pa haya regalo bao mesa, pero tambe el a abusa di su fundacion politico pa beneficio financiero personal. Benny Sevinger a haya ta bon pa haci su mes doño di e placa di e fundacion pa uzo priva. Cu otro palabra, ora bo cumpra carchi di BBQ di un partido politico, e placa ey ta pa campaña y no pa e politico of su casa djodjo cu e placa.

Asina hues ta yega na e conclusion cu e soborno ta asina grave cu hues ta haya cu solamente un castigo di prison incondicional ta adecua pa ex-ministro Benny Sevinger. P’esey hues a dun’e e castigo di 1 aña di prison, di cual 6 luna incondicional. Tambe hues a prohibi Benny di participa di eleccion pa cinco aña largo, pasobra hues ta considera Benny un peliger pa e funcion di minister y di parlamentario.

Awo, compara loke hues ta bisa di Benny cu e palabranan di Patrick Paskel mes na e programa di Enfoke dia 4 di april 2024:

“(…) bo ta compronde cu nos tin algo sistematicamente robes den nos husticia? (…) Mira e caso di Benny Sevinger, ta un berguensa pa Ministerio Publico. (…) Gasta miyon… ainda e homber no a bay cera. (…) E hues a bisa: e unico cos cu bo a haci robes, Benny, ta pa gasta placa di bo fundacion, cumpra un pasashi pa bo señora. (…) Esey e ta. (…) E no ta un fout cu el a haci den su trabao, e no ta un fout cu placa di pueblo, e no ta un fout como minister. Ta un fout di su politieke stichting. (…) Paul tambe, den tur e fandanga di Paul, nan a acusa Paul cu … mi kier sa, el a cumpra un regalo pa Melany for di placa di su fundacion. (…) No mag, ok. Mi ta kere si Ministerio Publico tin gana di investiga bon, bay investiga tur stichting politico di tur partido. No di AVP so. Bay di MEP tambe, no.”

Bo por check e riba YouTube na 1:02:37 en adelante.

Tanten Patrick Paskel sigui e rumbo aki di su impotencia periodistico, Enfoke ta keda un noticiero chimbo y Patrick mes e mucha manda di AVP, cu – na su turno – ta mustrando pa ta ladron den nos mesun cas.