Discurso Minister Xiomara Maduro na Aruba Dag 2024

Diadomingo ultimo a tuma luga e celebracion di Aruba Dag 2024 na Broodfabriek, Rijswijk cual a resulta un exito grandi. Minister Maduro tabata presente pa comparti un rato ameno cu Arubianonan y tur cu tin Aruba den nan mente y curason cu celebracion di nos Dia Nacional na Hulanda.

E mandatario a hiba e siguiente discurso:

Mi ta sumamente contento cu despues di cinco aña cu awe nos por celebra nos Dia Nacional di Himno y Bandera atrobe dilanti un sala asina yen cu caranan di alegria. Y mas importante ainda di sinti nos calor, e calor Arubiano cu ta brota di nos hendenan awe tardi y ta yena e luga aki cu nos ambiente y cultura Arubiano.

Awe ta un dia importante ya cu nos ta conmemora cu día 18 di maart, 48 aña pasa, e bandera di Aruba a bay laira pa prome bes hunto cu cantamento di nos Himno ‘Aruba Dushi Tera’ den stadion Wilhelmina. Un momento historico pa nos Pais Aruba, unda cu nos simbolonan nacional a trece nos mas cerca di otro y pone nos sinti nos mes Arubiano den mente y curason.

Arubadag a inicia na aña 1982 ora cu sr. Gilberto François ‘Betico’ Croes en feliz memoria a mira e necesidad pa organisa un encuentro pa informa e comunidad Arubiano na Hulanda di tur e preparacionnan pa por logra e Status Aparte pa Aruba por a bira un Pais. Un encuentro caminda e Arubiano y tur otro persona cu ta interesa den Aruba, por a bini hunto y keda den contacto kico tabata pasando den nos Pais. E union aki tabata necesario pa logra conserva Patria y e forsa di coherencia cu nos tabatin mester pa nos Pais por a logra su metanan.

Aruba a haya su Status Aparte den Reino Hulandes na aña 1986 y  Arubadag a desaroya durante e añanan y a bira un tradicion pa Arubianonan cu ta establece akinan y tur otro hende cu tin Pais Aruba den nan curason pa topa otro, celebra nos Dia Nacional y comparti pensamentonan. Un dia pa nos por biba nos Cultura hunto cu amistadnan y famianan cu kizas nos tin hopi tempo sin mira. Un día pa den union nos celebra nos cultura den un ambiente ameno di musica, baile y cuminda típicamente Arubiano. Ademas pa nos laga e Hulandesnan sinti y experiencia un tiki di nos Cultura Arubiano, pa asina nan por comprende nos miho. Ban sigui haci uzo di e plataforma di Arubadag pa crea union y fortifica nos forsa di coherencia na bienestar di nos Pais.

Ta masha importante pa keda cu vinculo cu bo Pais natal ora bo bay biba den exterior. E luga caminda bo lombrishi ta dera, manera nos grandinan ta bisa. E cuna di bo identidad.

Awe ta un dia importante, un dia pa celebra nos identidad. E aña aki na Aruba nos a celebra nos Dia Nacional cu e lema ‘Aruba, orguyo di nos tur!’

Nos tin hopi motibo pa ta orguyoso di nos Pais. Historia a demostra cu nos Arubianonan ta e forsa di coherencia cu nos Pais cu ta haci Pais Aruba un Pais resiliente. Cu union, creatividad, perseverancia,  dinamismo di nos hendenan y cu un fe inmenso nos a surpasa varios reto den pasado. P’esey awe nos por bisa cu e forsa di nos yiunan di tera, trahando duro y den union, nos Pais ta recuperando satisfactoriamente economicamente y financieramente despues di e pandemia. Esaki a wordo demostra den rapportnan di evaluacion di varios entidadnan internacional importante. Ademas despues di basta tempo y durante dos aña sigui Pais Aruba tin un Presupuesto cu un un surplus. Esaki ta trece confiansa den inversionistanan pa cu Pais Aruba. Aruba su tasa di desempleo a baha na 4.3% cu ta esun di mas abou den historia y  e industria di turismo na Aruba ta creciendo y ta pasando door di su miho momentonan. E resultadonan aki ta motiva y inspira nos pa sigui traha duro na bienestar di nos Pais. Pruebanan cu nos hendenan ta kere den nos Pais.

Nos tin hopi mas motibo pa ta orguyoso di Aruba. Banda di nos herencianan cultural, nos tradicionnan, monumentonan, nos naturalesa, playanan, nos carnaval, nos stabilidad político y nos seguridad, nos hendenan ta e tesoro cu mas balor cu nos Pais tin. Arubianonan cu ta traha duro tur dia pa progreso di nos Pais Aruba. Arubianonan cu ta kere firmemente den nos Pais Aruba.

Nos Arubianonan ta conoci pa e amor y stimacion cu nos tin pa nos Patria. Aunke cu boso ta establece den exterior corda hiba nos Pais Aruba semper den boso mente y curason. Boso ta nos representantenan den exterior, nos embahadornan cu mester carga nos bandera cu honor y respet. Inculca den boso yiunan e amor pa nos cultura, pa asina nos identidad por continua den futuro generacionnan.

Pa keda firme den nos identidad, nos mester keda kere den nos Pais Aruba, nos mester kere den nos hendenan, nos historia y nos potencial como Pais chikito pero grandi na curashi y talento. Ta e amor y dedicacion na nos isla ta alimenta nos orguyo y lealtad. Nos ta spera di mira boso pronto na cas bek, sea pa biba of bishita pa yuda nos traha na un miho Aruba.

Pa conclui mi ta yama un danki na Arubahuis, Massive Productions Holland y Deal Entertainment pa organisa e Dia aki. Boso hunto a hinca un bon programa den otro cu un tremendo show presenta door di nos mes artistanan local. Un danki tambe na De Broodfabriek Event & Centrum y tambe na Gobierno di Aruba, Ministerio di Cultura  y na tur cu a duna un aporte na e celebracion di nos Dia Nacional aki na Hulanda.

Un pabien na cada Arubiano y na tur cu tin Aruba den nan curason y mente cu celebracion di nos Dia Nacional na Hulanda. Laga nos hunto den un ambiente sano, celebra nos Himno y Bandera, nos herencia, nos cultura y nos identidad.

Cultura bo tin cu bib’e y cu cada un di nos su participacion, nos ta engrandec’e.

Pasa un dushi atardi y sigui disfruta.