Ocupacion di cama poco poco bek na normalidad

Cifra mensual di Hospital pa luna di maart 2024

Horacio Oduber Hospital ta comparti cu comunidad di Aruba e cifranan pa loke ta luna di maart 2024. E cifranan aki banda di brinda transparencia y informacion ta duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto donacion di sanger a tuma luga na Bloedbank y mas.

Na maart a hospitalisa 780 pashent cual ta menos compara si compara esaki cu februari (811 pashent) y tambe januari (882 pashent). Na luna di maart e admision di pashent tabatin un duracion di un promedio di 4,1 dia. E ocupacion di cama durante luna di maart tabata 84,9%, pues mas abou cu luna di februari  cu tabata na 96,6%. A tuma luga den Hospital su compleho di operacion 514 operacion cual ta menos cu na luna di februari (551 operacion).

Departamento di Emergencia a atende na luna di maart 2950 pashent cu ta mas pashent compara cu na luna di februari (2806 pashent).  Ta importante pa menciona tambe cu 45% di e total na maart no tabata rekeri cuido di emergencia.

A nace un total di 71 baby durante luna di maart di cual 33 ta mucha homber y 38 ta mucha muhe. Y na februari Bloedbank Aruba a ricibi un total di 154 donacion di sanger.

Specialistanan den servicio di Hospital a haci un total di 6791 consulta cu pashent cu ta 436 consulta mas cu na luna di februari. Departamento di radiologia a haci un total di 4499 test manera CT scan, MRI, echo y mas. Un total di 11513 persona a bishita LABHOH pa haci nan test diagnostico. Y na luna di maart un total di 800 pashent a sali for di Hospital y regresa nan cas.

Nos vision na HOH ta pa tin cuido accesibel pa un y tur sin mester afecta e calidad y esey nos ta traha diariamente riba dje. Sin nos coleganan cu semper t’ey esaki no lo ta posibel, p’esey palabra di gratitud pa un y tur cu ta traha y ta forma parti di HOH.