Parlamentario Alvin Molina (MEP): Nos ta gradici Luna Foundation p’e trabou cu nan ta eherce.

Segun estudionan, hende cu ta haci daño na animal, no ta stop na animal so. Tin un relacion estableci entre abuso na animal y violencia na hende. Un ley fuerte pa proteha nos mascotanan, por yuda preveni pa un abusado di bestia bira abusado di mucha.
Riba Dia di Rey, hunto cu mi colega Sra. Setty Christiaans – Yarzagaray, nos  a tuma e oportunidad pa bishita Luna Foundation y mustra nos aprecio p’e trabou cu e boluntarionan ta haci pa brinda e cachonan cu un pasado traumatico un futuro briyante. E boluntarionan ta duna hopi ora di nan tempo liber, energia y amor pa bienestar di e pober animalnan. Na Luna Foundation nan ta ricibi cuido medico, hopi cariño y speransa pa un bon hogar. Actualmente, tin mas cu 160 cacho bandona, maltrata y no desea pa nan doño. Esaki ta  un indicacion di e seriedad di e problema. Tin varios fundacion cu ta compartiendo e lucha pa salba e cachonan abusa. Mescos cu a trata e ley contra abuso di mucha, parlamento ta trahando pa amplia e ley contra abuso di cacho. Durante e reunionnan di comision nos dilanti, parlamento lo enfoca riba e ley,  “handhaving” di e ley y conscientisacion. Nos ta gradici e boluntarionan di Luna Foundation p’ e excelente trabou cu nan ta eherece.