Minister Endy Croes: A ELABORA RIBA DIFERENTE ASPECTO DI ENSEÑANSA CU STAF DI INTERNATIONAL SCHOOL OF ARUBA

ORANJESTAD: Recientemente, Minister di Enseñansa y Deporte Endy Croes a ricibi bishita di Sra. Rousanne de Weever y Sra. Dalmarie Anderson di International School of Aruba. Durante e reunion a dialoga tocante e program General Education Development (GED), cual ta un alternativa pa e adultonan cu no por a finalisa scol secundario di e forma tradicional. Tambe, por ofrece hoben bou di 16 y 17 aña bou di cierto circunstancia. GED a desaroya originalmente na aña 1942 como un alternativa util y viabel pa e militarnan cu a wordo manda den exterior pa lucha den guera prome cu nan a finalisa scol secundario. Manera ta conoci, desde aña 2017, International School of Aruba hunto cu Ministerio di Enseñansa di Aruba a inicia e programa GED, unda ta ofrece esnan cu no a termina scol secundario e alternativa pa finalis’e y haya un diploma. Minister Endy Croes ta indica cu e test aki ta habri porta pa e studiantenan aki por continua cu un estudio na un Junior College y/of College na Merca of Canada pa sigui desaroya nan mes.

Segun articulo 3, lid 1-d di Landsbesluit, mester haal un score di minimo 165 pa cada materia di GED, sumando un total di 660 punto pa bin den remarke pa Arubalening. Durante e encuentro aki, Sra. de Weever y Sra. Anderson a haci peticion pa reconcidera e score y ahusta esaki. Minister Endy Croes a splica cu esaki ta un trayecto di Landsbesluit, pero cu lo sigui reuni cu nan y cu diferente persona mas den veld pa evalua si tin posibilidad pa reduci e score di 660 pa 640. E mandatario di Enseñansa a pidi nan pa skirbi un carta, treciendo nan argumentonan dilanti. Ademas di esaki, nan a dialoga tocante diferente reto cu International School of Aruba ta pasando aden. Minister Endy Croes a indica cu nan lo keda den contacto cu otro pa busca un solucion pa nan peticion.