Prome Minister Evelyn Wever-Croes: GABINETE WEVER-CROES LO SIGUI TRAHA DI CERCA CU INSTITUTONAN ENCARGA CU PROTECCION DI NOS MUCHANAN

ORANJESTAD – Diahuebs mainta, Prome Minister Evelyn Wever-Croes tabata tin un reunion na Bureau Sostenemi cu diferente actor den e cadena di proteccion di nos muchanan, ora ta trata di abuso sexual di menor.

Presente durante e reunion tabata señora Magaly Maduro cu ta directora di Bureau Sostenemi, señora Janine Rodriguez di slachtsofferhulp, y señora Lisette Gomez cu ta e persona encarga cu e comision nacional ora ta trata abuso sexual di muchanan.

Prome Minister a indica cu e topico di e mainta aki tabata e proceduranan. Durante e reunion a papia di con e proceduranan ta ancra den otro y unda por bin mehoracion pa por logra e meta di proteha nos muchanan.

Manera ta conoci, luna pasa a wordo decreta como Luna Nacional di Conscientisacion Contra Abuso di Mucha, na unda a enfoca riba conscientisa pueblo en general riba e topico importante aki, y riba e castigonan cu a wordo aumenta caba desde aña 2020. Durante e luna aki tambe, a enfoca riba e riesgo cu e muchanan chikito ta core, mirando cu hopi biaha ta esnan cu ta mas cerca di e mucha, ta e abusado.

“Esaki ta un topico cu mi ta carga hopi cerca di mi curason. Gabinete Wever-Croes ta comprometi pa sigui traha di cerca cu e institucion nan aki pa asina sigura proteccion di nos muchanan. Gobierno ta actualmente enfocando riba e procesonan den Gobierno, pa sigura cu tur keho cu wordo entrega, ta wordo atendi debidamente”, Prome Minister a duna di conoce.