GOBIERNO TA CONMEMORA DOS AÑA DI COVID-19 NA ARUBA Y TA RECORDA CIUDADANONAN CU A FAYECE CU COVID DURANTE E PERIODO AKI
Mientras cu na comienso di Covid-19, ningun ciudadano di mundo por a pensa cu e pandemia aki lo a dura asina largo, diadomingo dia 13 di maart a cumpli dos aña di Covid-19 na Aruba. Pa e motibo aki, Gobierno di Aruba, hunto cu CrisisTeam a tene un ceremonia solemne na Bestuurskantoor pa asina conmemora e hecho aki y especialmente pa recorda e victimanan cu a fayece cu Covid-19 durante e periodo aki. ‘Den Union pa Recorda y miho Speransa pa Futuro’.
Presente na e ocacion tawata Presidente di Parlamento, señor Edgard Vrolijk, Miembronan di Parlamento, Prome Minister Evelyn Wever-Croes, Minister di Salubridad Señor Dangui Oduber y demas ministernan, Secretario di Conseho di Minister señora Grace Koolman, Rino Hermans di CrisisTeam, Sharline Koolman di DVG, Ronella Croes di Ata, Vanessa Tjon-Kock y demas invitadonan cu a acudi na e yamada pa atende e acto solemne aki.
Na e ocacion a hiba palabranan Prome Minister, señor Rino Hermans, señora Sharline Koolman, señora Ronella Croes y Minister Dangui Oduber. Tur a menciona con a maneha e crisis durante dos aña y con a logra pa awe Aruba ta recuperando di e pandemia aki.
Despues di e discursonan, a tuma luga un ofrenda floral hopi emocional pa despues tuma tambe un minuut di silencio pa tur esnan cu a fayece cu Covid den e dos añanan tras di lomba. Na final a cende e luz di speransa como un simbolo pa ilumina nos dushi Aruba.
