Partido MEP: ENCUENTRO DI BAN TOPA NA SANTA CRUZ A CONTA CU UN SALA COMPLETAMENTE YEN

ORANJESTAD – Diamars 7 di Mei, a tuma luga un biaha mas e evento organisa pa Partido Movimiento Electoral di Pueblo MEP, “Ban Topa”, cu ta un evento cu partido MEP a cuminsa cu ne na aña 2023. E meta di “Ban Topa” ta pa cierto candidatonan riba lista, reuni cu habitantenan di e bario cu nan ta representa pa asina comparti informacionnan valioso cu e habitantenan. Durante e encuentro aki, esnan presente tin oportunidad di scucha informacionnan cu ta toca comunidad en general pero tambe di nan bario. Tambe nan tin e oportunidad di haci pregunta, delibera y trece nan opinion y preocupacionnan dilanti, cu candidatonan presente lo contesta debidamente.

Desde inicio di “Ban Topa”, diferente candidato riba lista ya caba a reuni cu habitantenan di varios bario rond di Aruba, entre otro San Nicolas, Savaneta, Paradera, Piedra Plat, y Noord. Diamars ultimo a toca turno na bario di Santa Cruz. E encuentro a tuma luga na Cede di MEP y a conta cu un sala completamente yen.

Candidatonan presente cu a duna un discurso e anochi aki, tabata Parlamentario Setty Chrsitiaans-Yarzagaray cu a papia di e tareanan di un parlamentario; Candidato riba lista Shannon Henriquez cu a duna un splicacion amplio riba e ley di kinderopvang; Presidente di Parlamento Edgard Vrolijk cu a conta di su tareanan como Presidente di Parlamento; y Lider di partido Evelyn Wever-Croes cu a toca e tema di e recuperacion di Aruba y e retonan.

E anochi aki, mescos cu e eventonan di “Ban Topa” anterior, tabata uno exitoso. Esnan presente a haci varios pregunta y sugerencia, pero alabes a duna aplauso na tur e logronan, apesar di tur reto, di e gobierno actual. Partido Movimiento Electoral di Pueblo MEP ta gradici e bario di Santa Cruz, pa nan participacion.