Gobierno

Minister Dangui Oduber : BISHITA DI PAHO TAWATA UNO EXITOSO

Oranjestad – Awe mainta Minister Dangui Oduber, hunto cu un team di ministerio di Salud Publico y Departamento di Salud Publico (DVG) tawata tin e honor pa ricibi un delegacion di Pan American Health Organization (PAHO). E delegacion a consisti pa dr. Vivas hunto cu su coleganan dr. Haris y sra. Taylor. Nan ta forma parti di e representantenan pa Aruba den World Health Organization (WHO).

E bishita di PAHO tawata entre otro pa Dr. Vivas presenta su credencialnan oficialmente na Aruba su Minister di Salud Publico. Tambe a tuma oportunidad pa papia ariba diferente topiconan cu ta toca salud na Aruba.

Advertisements

A elabora ariba Aruba

  • Plan nacional contra malesanan cronico. (NCD)
  • Posibilidadnan pa digitalisa e sector di cuido.
  • Diferente maneho y programa tumando luga ariba e problematica di obesidad na Aruba, pa asina evita problemanan cu ta bin door di malesanan cronico.

PAHO a mustra hopi interes tambe pa e legislacion cu Ministerio di Salud ta trahando ariba dje cu e meta pa reenforza e sistema di sector di cuido pa cu si tin pandemia den futuro.

Pa hopi aña largo (DVG) y Ministerio di Salud Publico ta trahando hopi di serca cu PAHO. Na aña 2023 Aruba a tene un encuesta cu a yama STEPS2023, cual tawata un investigacion pa haya sa e estado di salud di nos comunidad. Diabierna awo, e resultadonan di e encuesta aki lo wordo presenta oficialmente den PAHO su presencia.

Minister Oduber a tuma e oportunidad tambe pa informa Dr. Vivas di tur e exitonan cu Ministerio di Salud y tambe tur stakeholders den sector di cuido ta logrando den e ultimo añanan aki encuanto prevencion den salud. No por a keda sin menciona e exito di Healthy Lifestyle Center cual ta e centro pa yuda y guia comunidad di Aruba pa cambia nan estilo di bida pa uno saludabel. Ya caba tin 2 di e centronan aki cu ta yudando mas cu 500 cliente.

PAHO a confirma di sostene Aruba den tur programa cu tin de haber cu prevencion den salud. Dr. Vivas a keda masha impresiona cu Aruba su progreso trahando ariba prevencion den salud.