Durante su bishita na Conseho di Minister: Executive Director di IMF sr. Paul Hilbers cu palabra di elogio pa e recuperacion financiero y economico di Aruba
Diamars mainta Conseho di Minister a ricibi bishita di Executive Director di IMF sr. Paul Hilbers kende tabata tin palabra di elogio pa e manera impresionante cu Aruba a bin ta recupera di e pandemia di COVID-19.
Sr. Hilbers ta forma parti di e board di IMF y a indica cu Aruba ta goza di un bon reputacion cerca IMF. Aruba su economia ta bayendo bon, finansa publico ta wordo maneha basa riba surplus, e debe di Aruba ta bahando, tin stabilidad monetario y financiero, e sistema financiero ta integro y Aruba ta trahando caba pa por mitiga efectonan di cambio climatico. Ta puntonan hopi positivo cu ta wordo mira pa wowo di inversionistanan internacional y tambe pa e turista cu ta scohe pa e stabilidad cu Aruba ta ofrece como destino turistico.
Esaki sigur ta bon noticia pa Aruba y ta e resultado di trabou duro y serio cu a wordo haci pa nos hendenan di Aruba. Minister Maduro di Finansa kier gradici y felicita su ekipo financiero, colega Ministernan, Parlamento y Aruba henter pa e mensahe positivo aki cu ta keda treci pa e Executive Director di IMF. Nos por ta orguyoso di locual nos tur como comunidad ta logrando na bienestar di nos Pais.
