Lider di Partido AVP, mr. Mike Eman ta anuncia: UN OPERACION NACIONAL PA CONTROLA VOTACION: DIA V !                      

E biaha aki lo no permiti manipulacion cu e proceso electoral. Partido AVP ta mira den e hecho cu Fraccion di MEP y RAIZ, bao instigacion di Evelyne Wever Croes, a nenga di accepta e amienda di AVP riba nos kiesverordening pa sigura transparencia y un proceso corecto y honesto di votonan cu claramente kier tene porta y bentana habri pa ripiti iregularidadnan cu a tuma lugar na 2021. Pesey awe e Lider di Partido mr. Mike Eman durante un confrencia di prensa dilanti di censo a anuncia un operación nacional pa controla e proceso electoral bao di e nomber “DIA V !”.

Eman a splica cu e dia V ta e dia cu lo sigura cu Votonan lo worde conta manera debe ser; e DIA V ta e dia cu lo garantisa cu Voluntad di pueblo lo prevalece y cu e DIA V ta e dia cu Victoria di Pueblo lo triunfa. Pa esaki partido AVP ta bai entama un proceso nacional cu voluntarionan den y na tur urna electoral pa  sigura e Voto y Voz di Pueblo y un Victoria keda celebra. Eman a bisa di tin confianza den e presidentenan di Conseho Electoral cu a bin despues di Glenn Thode, esta mr. Monica Kock y Rossi Marchena, pero e experiencia cu Gabinete Wever-Croes y rol di Censo den e proceso electoral 2021 a laga un smak hopi amargo atras den pueblo.

Colega drs. Mervin Wyatt-Ras tambe a mustra cu ta hopi lamentabel cu e Fraccion di MEP y RAIZ no a sostene e amienda di AVP. Esaki ta un indicacion cu nan no tin nigun bon intencion den e proximo eleccion. Inicialmente e lider di fraccion di MEP, Hendrik Tevreden a bisa cu nan ta positivo pa cu e amienda di AVP te ora cu Evelyne WeverCroes a bin ordena fraccion di MEP y RAIZ pa vota contra e amienda di AVP. Di parti di Fraccion di MAS, ACCION 21 y miembro independiente Gerlien Croes si a sostene e aminda di AVP.

Consehoro huridico di Fraccion di AVP, Wendfrick Cicilia cu tabata tin un contribucion substancial den formulacion di e amienda di fraccion di AVP a splica e difente stipulacionan den e amienda. E a splica e arituculo 84ª nobo cu e amienda a propene, esta ora tin “ernstige vermoeden” cu cosnan no a bai bon y bin un peticion substancia pa un reconteo cu e Presidente di e Conseho Electoral lo mester concede un reconteo. Tambe Cicilia a splica e articulo den e amienda cu ta ancra e proteccion di e stemblijetnan pa nan no worde destrui manera cu a sosode na 2021 den pleno temporada cu tabata tin un disputa ainda. E amienda ta ancra un obligacion di mantene e stembiljetnan pa 3 luna y hasta mas largo tanten cu tin un disputa riba conteo di voto dilanti corte of na Conseho Electoral.

E lider di AVP, mr. Mike Eman, a clausura e declaracion di Prensa mustrando cu pa garantisa e cambio den proximo eleccion, e sosten pa nos grandinan, e aumento di pensioen cu 50%, e remedinan bek pa nos grandinan, e acuerdo cu Hulanda pa un Fondo di Inversion pa Aruba, oportunidad husto pa nos inversionistanan y entrada husto pa nos empleadonan y mucho mas di e puntonan di AVP pa crea un alivio  y perspectiva e votonan mester worde conta corectamente y e voluntad di pueblo mester prevalece. Eman a mustra cu ora di bai urna, sera cortina y marca e voto e Pueblo mester tin seguransa cu su voluntad ta prevalece. “Ora tur voto worde conta honestamente nos ta sigur tambe cu por celebra e victoria e biaha aki, mustrando signal di un V cu su dedenan Eman a envatisa e Dia V di operación nacional pa sigura e votacion na Aruba.