GAS NATURAL E SOLUCION LOGICO PA E PRIJS HALTO DI PETROLEO

Tempo lo demostra e vision excelente di Web Aruba N.V. y Gabinete Wever-Croes II

Specialmente den e ultimo lunanan pueblo por a wak un aumento drastico den e prijs di gasolin. Como Vice-Voorzitter di e Comision Fiho di OverheidsNV’s, Nutsbedrijven en Energie mi ta siguiendo e desaroyonan aki hopi di cerca. E aumento drastico di gasolin a sucede pa motibo di e prijs creciente di petroleo riba mercado. Awor cu tin un guera na Ukraina, e aumento di prijs di petroleo a acelera ainda mas. Ora nos lesa noticia di diferente paisnan grandi manera Merca, na Europa y otronan tur ta kehando di esaki. For di Maart aña pasa e prijs di bari di Petroleo tabata $65.41 compara cu e prijs di awe cu ta $103.88. E aumento drastico den e prijs di petroleo cu semper a demostra di ta hopi instabiel, tambe ta afecta nos planta nacional di energia y awa Web Aruba N.V. Nos planta nacional ta opera riba HFO, cu ta significa: Heavy Fuel Oil. Si nos compara e prijs di aña pasa Maart cu e aña aki Maart tin un aumento di 58.81% den e prijs di petroleo.

E ta un di e varios factornan pakico Web Aruba N.V. y Gobierno a tuma e decision clave pa introduci Gas Natural como e fuel di transicion pa Web Aruba N.V. traha cu ne. E Prijs di Gas Natural ta hopi mas economico y limpi compara cu HFO. Informacionnan recien cu a yega na mi persona ta indica cu e proceso di Eagle LNG ta canando hopi bon y segun e timeline cu nan a establece pa por keda cla pa cuminsa construi e planta y bunkering station.

Mi no tin duda cu Aruba lo uni su mes na paisnan industrial grandi cu ta opera y biba riba un nivel halto y moderno pa hopi aña caba, usando Gas Natural. Aruba mester ta orguyoso cu nos no ta bay depende riba HFO mas y e inseguridad cu esaki ta trece pa via di su prijs instabiel. Ademas e suma haltisimo cu Web Aruba N.V. ta pagando actualmente pa su fuel, esta HFO, lo baha considerabelmente. Esaki ta un beneficio logico pa nos pais. Naturalmente esaki lo traduci den un maneho cu lo tin e flexibilidad pa sigura un bon prijs di awa y coriente pa pueblo. Adicionalmente e lo crea fondonan pa Web Aruba NV por sigui inova y inverti den e planta,pa esaki por sigui garantisa un suministro constante y stabiel na nos pueblo.

Den e crisis aki locual Aruba mester aworaki ta establece e vision pa un Aruba moderno y resiliente cu ta rekeri decisionan concreto y rapido pa yuda nos pueblo acapara cu e situacion economico actual y cu lo trece alivio den cartera di tur hende. Gas natural lo yuda Web Aruba N.V. y nos pueblo yega na un stabilidad cu nos no a conoce prome.