Ministerio di BZK ta establece dos catedra nobo pa Reino

Ministerio di Asuntonan Interno y Relacionnan den Reino (BZK) ta establece dos catedra (puesto di profesor) nobo pa Reino. Ta bin un catedra politicologia/derecho administrativo y un catedra antropologia/sociologia.
A selecta Universidad di Leiden y Koninklijke Nederlandse Akademie van Wetenschappen (KNAW), Koninklijk Instituut voor Taal-, Land- en Volkenkunde (KITLV), den colaboracion cu Universidad di Amsterdam (UvA), como sitionan di establecimento di e catedranan. Universidad di Leiden lo ocupa e catedra di politicologia/derecho administrativo y KITLV/UvA e catedra di antropologia/sociologia.

Titularnan di e catedranan
E Colegionan Ehecutivo di UvA y Universidad di Leiden a aproba e proposicion pa nombra nan candidado. Antropologo Social y Cultural dr. Francio Guadeloupe ta bira e titular di Antropologia Publico di Relacionnan den Reino pa KNAW/KITLV/UvA. Dr. Wouter Veenendaal, profesor asocia universitario di Politicologia Comparativo na Instituto di Ciencia Politico di Universidad di Leiden, ta bira titular di Representacion Democratico den Reino pa Universidad di Leiden. Lo pon’e na disposicion di KITLV na Leiden.

Desaroyo amplio di conocemento
E dos catedranan special ta un iniciativa di e directorado general Relacionnan den Reino (DGKR) di ministerio di BZK den cuadro di desaroyo di conocemento amplio. E catedranan ta contribui na fortificacion di e funcion di conocemento den DGKR. Tin necesidad di atencion cu ta tanto profundisa como amplia riba tereno di e niche cientifico Relacionnan den Reino cu ta genera mas investigacion, sinergia y spin-off.

Universidadnan Caribense
E esfuerso ta pa embolbi e universidadnan y investigadonan den e tres paisnan Caribense di Reino estrechamente den e catedranan. Ta haci esfuerso pa yega na un colaboracion cu e universidadnan Caribense, caminda por ehempel por intercambia docente y investigado. Ta sigui desaroya e encargo mas den consulta cu e universidadnan Caribense.

Balor enorme
Secretario di estado Alexandra van Huffelen di Relacionnan den Reino: “Mi ta sumamente contento cu a logra realisa e colaboracion aki cu e universidadnan. Conocemento cientifico confiabel ta di enorme balor y por contribui na sigui mehora e colaboracion den Reino mas. Un bunita logro, hustamente den e aña cu nos ta celebra cu nos den Reino ya ta 70 aña uni pa medio di Statuut”.

Titular Francio Guadeloupe: ‘Casi mitar di personanan cu un origen Caribense ta biba na Hulanda. Na mes momento tin miles di persona ta biba riba e islanan di kende nan antepasadonan a nace na Hulanda. E realidad aki ta mas grandi cu e tensionnan entre politiconan na Den Haag y politiconan riba e islanan. Nos mester reconoce cu relacionnan den Reino den practica tin efecto riba un frecuencia mas abou cu e nivel di esnan cu ta stipula maneho. Ami kier enfoca riba loke ta haciendo den comunidad y den politica pa logra haci Reino mas igual, husto y inclusivo pa tur hende. Esey ta loke ami kier investiga, hunto cu e institutonan di conocemento riba tur e seis islanan y na Hulanda.’

Titular Wouter Veenendaal: ‘Reino Hulandes tin un structura unico. E ta consisti di cuater pais autonomo y igual, pero un di e paisnan ey – Hulanda Europeo– ta superior politicamente y institucionalmente. Esey ta lanta interogante tocante e representacion democratico den Reino cu ami kier bay investiga den e encargo di enseñansa aki. Hunto cu instituto- y expertonan riba e seis islanan y na Hulanda mi ta spera di duna un impulso na desaroyo di conocemento y enseñansa riba tereno di politica y democrasia den nos Reino. Mi ta anhela enormemente pa colabora cu sientifico- y institutonan na ambos banda di oceano.’

Proseso habri
A realisa e catedranan pa medio di un proceso habri. A pidi e universidad- y institutonan di conocemento pa entrega un proposicion cu propio contenido y enfoke di investigacion . A balora e proposicionnan di Universidad di Leiden y KITLV/KNAW/UvA como esnan di mas miho.
DGKR ya ta colaborando cu Haagse Hogeschool den cuadro di minor Relacionnan den Reino.