Booshi Wever: SIN “BUK” A LOGRA E ORAGANO B.U.K!

Diabierna dia 24 di mei 2024 Aruba un biaha mas, por medio di un gobierno “STREAKER” a entrega nos autonomia.
E derecho inalienabel di e pueblo Arubano a wordo entrega. E derecho adkeri pa e pueblo Arubano conforme tratadonan y combenionan internacional. Ki mishi un gobierno cu un mayoria hopi marginal kita e derecho aki. Pa colmo ta haci mofa di e supuesto “hazaña” aki bisando cu e no a “BUK”! Pa completa e obra e subrina di nos Libertador ta expresa hasta hubilo tambe.

E lucha di mas di 100 aña cu a cuminza cu e carta cu sr. Dussenbroek a manda na fin di añanan 20 di siglo pasa pidiendo pa Aruba por tin su propio gobernacion, y cu a culmina danki na sr. Betico Croes su vision y perseverancia, sin usa palabranan racista ni segregista, pero a mustrando pueblo Arubano y mundo henter cu nos pueblo Arubano tin e derecho inalienabel di autodeterminacion. E derecho aki ta ancla den e Manifiesto di Nacionnan Uni y na 1986 nos a haya nos tan anhela Status Aparte.

Diabierna 24 di mei 2024 ta un “black Friday ” na unda un biaha mas e colonizador (Hulanda) a duna e colonia (Aruba) un spiel y e colonia a dune, sin “buk”, nos klompi di oro esta nos Autonomia Financiero!
Ya caba Aruba ta “overgeleverd” na Stranheronan y Inversionistanan cu nan capital ta di procedencia dudoso y awor nos a entrega nos “autonomia financiero” sin “buk” na gobierno Hulandes na un forma sin escrupulo y sin berguenza! Prome tabata CHE. Despues ta COHO y awo ta BUK = un Bijzondere Uithollingsorgaan van het Koninkrijk, cu despues di haci che cu nos, ta laga nos coho.

E partidonan AVP ni MEP tin e autoridad moral pa bringa e “traicion” aki, pasobra nan ta e autornan intelectual di e desaster aki. Ta e otro partidonan mester pone nan nanishi den mesun direccion y core cu e plaga Berde y Geel.