MINISTER ENDY CROES A ELABORA RIBA E RETONAN DEN ENSEÑANSA DI ARUBA

ORANJESTAD: Manera ta conoci, scarsedad di maestro ta un problema mundial y na Aruba e no ta un excepcion. Na aña 2023, Hulanda tabatin un “tekort” na 9000 docente. Minister Endy Croes a informa cu Ministerio di Enseñansa hunto Departamento di Enseñansa (DEA) a realisa recien un inventarisacion di maestro y a trata esaki cu IPA. Tin dos categoria di maestro esta, maestro 4-8, kende ta duna les na kleuterschool te cu klas 2 di scol basico y maestra(o) 6-12 cu ta duna les na klas 1 te cu klas 6 di scol basico. “Na Aruba na e momento aki nos falta hopi maestro 6-12. A inventarisa algo mas cu 100 maestro 4 -8”. Basa riba e resultado aki a dialoga cu IPA pa cuminsa cu un programa parti atardi cu lo forma e maestra(o) 4-8 pa bira un maestro 6-12 y asina por cubri mas klas y lo yuda resolve e problema aki pa un gran parti. Ademas di esaki, Minister Endy Croes a agrega cu recientemente 24 docente a expresa nan deseo di sigui cu e MEN diploma esta, “Master Education Needs” cu IPA ta ofrece y probablemente den luna di januari 2025 lo cuminsa cu e estudio aki.
“Como Minister di Enseñansa, mi ta na altura di loke mester drecha pa por mehora e calidad di enseñansa na Aruba. Claro cu nos no por drecha mundo di awe pa mañan, pero si nos ta pone e prioridadnan y basa riba esaki, nos ta traha e plan concreto pa por cristalisa esaki”, e mandatario di Enseñansa a indica. “Na final di dia e ta keda deber di gobierno pa pone e vision, meta, prepara e docente y infrastructura pa por realisa e cambionan den enseñansa. Nos ta traha pa brinda nos yiunan un miho calidad di enseñansa”, Minister Endy Croes a subraya.
E no ta un secreto cu hopi bes un docente ta haya e retonan mas faborabel y atractivo. Awendia, poco ta esnan cu ta traha 30 aña den un sector. Den e mundo moderno, principalmente nos hobennan ta studia y ta cambia mas lihe, si tin algo mas atractivo pa nan. Nos mester keda prepara e plataforma pa prepara docente. Tur aña cada stichting y DPS den luna di februari y maart ta haci e “bezetting”, pues cuanto maestro nos mester pa augustus. Por ehempel aña escolar nobo DPS lo tin un “tekort” di 15 docente, pa motibo cu hopi docente ta bay cu pensioen. Den e caso aki nos por atrae nan pa keda un (1) aña mas, mientras nos ta preparando otro docentenan. Tambe, sa pasa cu tin demasiado docente den un sector cu bo no tin trabou pa nan, por ehempel loke a pasa dos aña pasa cu e docenentenan di Papiamento, 22 a termina nan estudio y no tabatin luga pa tur e momento ey. Esaki ta e retonan cu bo ta biba cu ne, tur cos den bida ta trata di planifica y abase di planificacion nos por planea miho pa futuro. Ademas di esaki, e ambicion pa bira docente a bira menos, e ta un vocacion hopi bunita. “Ora cu bo papia cu un docente bo ta mira e amor cu nan tin pa traha, por ehempel, ora scol a habri nan mes ta pone poco placa di nan mes cartera pa prepara e klas. Nan ta yuda e muchanan den necesidad hopi bes y esakinan no ta bin den prensa, pero bo ta scucha hopi di e storianan ey”, Minister Endy Croes a expresa. Sigur e ta un ofishi hopi bunita cu bo por yuda y prepara un pueblo y educa nos muchanan pa futuro. Asina keda inculca y inspira esnan cu ta caba un havo of hbo pa motiva nan pa sigui e carera di docente. “Esaki ta un trabou no solamente di Gobierno di Aruba, pero tambe di prensa. “Un trabou comun pa hunto nos keda inspira, stimula y motiva nos hobennan pa scoge e rumbo pa ta un docente”, e mandatario di Enseñansa a finalisa.