Prome Minister Evelyn Wever-Croes: ARUBA Y HULANDA A FIRMA E ACUERDO FINANCIERO

“E acuerdo aki ta un paso mas cerca di e alivio cu nos ta buscando, no solamente di e debe di covid, sino tambe riba e debe bieu cu gobierno a hereda”

ORANJESTAD – Diamars mainta, via un video conference, Prome Minister Evelyn Wever-Croes y Secretario di Estado Alexandra van Huffelen a firma e acuerdo financiero cu a wordo aproba dia 24 di Mei, 2024. Prome Minister a indica cu e firmamento di e acuerdo aki ta di gran beneficio pa pais Aruba, mirando cu e interes riba e debe di covid ta baha inmediatamente di 6.9% pa 5.1%, y lo trece 16 miyon florin adicional den e caha di gobierno. E extra placa aki, lo wordo inverti den proyectonan importante y tambe den e poder di compra di esnan mas vulnerabel, y pa mira con por alivia e peso di inflacion, apesar cu inflacion ta bahando.

Awor cu e acuerdo ta firma lo sigui pa e siguiente fase, cu lo ta pa negocia con pa yega na un Rijkswet. Y si logra yega na un Rijkswet prome cu Mei 2025, e ora e interes lo baha aun mas te na 3.4%, cu lo trece hopi mas beneficio pa Aruba.

Prome Minister a splica cu den e tempo cu ta bin, lo tin 3 punto pa negocia riba dje. E prome ta e normanan exacto, di cual IMF lo ta e consehero pa Aruba y Hulanda. E di dos ta pa defini e “exit bepaling”, pa asina tin un indicacion na ki momento gobierno por sali di e Rijkswet. Y ultimo ta pa negocia kico lo ta e areglo financiero cu Hulanda ta dispuesto pa duna Aruba, riba e debe bieu crea pa Gabinete Eman.

“Mi tin tur fe y confiansa cu nos lo sali afo, y logra e miho acuerdo pa pais Aruba. Pa cu e firmamento di awe, mi kier felicita Aruba en general, mirando cu nos ta un paso mas cerca di e alivio cu nos ta buscando, no solamente riba e debe di covid, sino tambe riba e debe bieu cu e Gabinete aki a hereda di e gobierno di AVP, cu den tempo di bonanza, a redobla e debe sin cu tabata tin mester”, Prome Minister a expresa.