Dia Mundial di Medio Ambiente 2024. Nos tera, nos futuro:

Inspirando un generacion di restauracion

ORANJESTAD – Awe 5 di juni ta celebra Dia Mundial di Medio Ambiente 2024, cu e tema “Nos tera, nos futuro, nos ta generacion di restauracion”. E tema den su magnitud ta encera e enfoke riba e importancia pa nos generacion restaura e tera y suela, para e formacion di desierto y traha riba resiliencia contra secura. Hopi parti na mundo ecosistemanan manera, areanan di mondi, terenonan cu a seca, lagonan y areanan natural di cua humanidad ta depende di dje ta bou menasa y a yega na su punto cu no por bira bek. Directie Natuur en Milieu, DNM ta reconoce e urgencia pa cuida nos medio ambiente pa bienestar di nos generacion actual y esun di futuro.

E ta crucial pa nos reconoce cu e salud di nos planeta ta directamente liga na nos propio salud y bienestar. Contaminacion di ecosistemanan, perdida di biodiversidad y cambio climatico ta manesanan real cu ta afecta nos tur. Pa medio di e comunicado di prensa aki, DNM ta haci un yamada na comunidad pa participa activamente den iniciativanan local pa restaura nos medio ambiente. Nos por traha hunto pa:

• Reduci nos consumo y asina baha e cantidad di desperdicio.
• Cumpra productonan for di productornan local y di e temporada; manera fruta cu ta di e temporada.
• Conserva recurso natural. Restaura y conserva areanan cu ta importante pa nos biodiverdidad.
• Planta matanan y cuida nos areanan cu ta berde di mata. Uni na gruponan di plantamento manera ‘Ban Lanta y Planta’ y ‘SyntropicA’ como un boluntario. Participa na plantamento di matanan di mangel ta yuda proteha nos costanan y ta aporta na engrandece e bida marino.
• Accion di Limpiesa den bario y na lamanan. Participa activamente na accion limpiesa Limpi Limpi cu ta un iniciativa introduci pa gobierno.
• Educa otro persona riba importancia di sostenibilidad y conservacion.

Hunto nos por laga un impacto positivo riba nos tera pa bienestar di generacionnan futuro.

Manera declara pa Nacionnan Uni den discurso secretario general Sr. Antonio Guterres: “Humanidad ta depende di e tera y e suela. Pero lamentablemente, un combinacion toxico di contaminacion, cambio climatico y destruccion di biodiversidad ta transforma tera fertil y ecosistema vibrante den un zona morto. E destruccion di mondinan, sabananan y otro areanan ta debilita habilidad di e tera pa sostene ecosistemanan, agricultura y e comunidad saludabel. Tur e consecuencianan ta cu cosecha ta bay malo, fuente di awa ta disparce, economia ta debilita y comunidadnan ta sufri y keda afecta. Desaroyo sostenibel ta sufri. Paisnan mester cumpli cu tur compromiso pa restaura e ecosistema y suela degrada manera stipula den e “Kunming-Montreal Global Biodiversity Framework” (GBF). Nan mester uza nan plannan nobo di accion climatico nacional pa 2030. ”  

E ultimo aki tambe ta e yamada di DNM na e participacion di ’stakeholders’ pa aporta na e ‘Nacional Biodiversity Strategic and Action Plan’, (NBSAP), cu ta e maneho den fase di formulacion na Aruba conhuntamente cu Ministerio di Naturalesa y e agencia di consulta TwyndraGudde. E NBSAP na Papiamento ta titula: “Nos Plan di Maneho pa Naturalesa di Aruba” ta e documento di maneho basa riba e Global Biodiversity Framework (GBF) cu ta e resultado di e conferencia di e partidonan na e Convention of Biodiversity (COP 15) na 2022. Esun cu ta formulando aki na Aruba ta enfoca riba meta y obhetivo cu tin prioridad pa nos. E lista di prioridad den e concepto “Plan di Maneho pa Naturalesa di Aruba” ta cerca stakeholdernan actualmente y despues lo inclui nan aporte den e NBSAP pa e bay pa Parlamento.

Nos ta e ‘Generacion di Restauracion’. Hunto, laga nos construi un futuro sostenibel pa nos tera y humanidad. Feliz dia Mundial di Medio Ambiente 2024.