Dennerich Kelly di AVP:Gobierno MEP/RAIZ no por negocia integridad si nan no tin integridad

Tras e desaroyonan politico relaciona cu e investigacion di Ministerio Publico denomina ‘Portulaca’, e hoben prospecto pa candidato Dennerich Kelly a mira e necesidad di expresa su punto. El a haci esey a traves di un declaracion radial den cual a enfatisa dicon integridad ta un piesa clave pa un miho sociedad y e gobierno actual no tin’e.
E por corda bon ainda, pasobra no tabata ni un decada pasa cu partido MEP, den oposicion e tempo ey, a pone grito na shelo y exigi e cabes di ex-Minister Paul Croes. Parlamentario cu awendia ta sinta den stoel di minister a manifesta cu tabata trata di un berguensa y cu e mester wordo retira.
Contrincante politico a lastra su nomber pareu cu esun di otro famia y simpatisante di e partido na mando, mientras cu investigacion ainda tabata tumando luga. Sinembargo awe, parlamentario di e partido mas grandi den coalicion ta totalmente mudo y scondi pa reacciona riba nan propio minister. Gobierno a manda nan socio minoritario, RAIZ, pa sali na nan defensa.
“Ki dia lo bisa ta basta y te aki! Corda cu e partidonan den gobierno a haci y a sostene un palabracion, caminda cu si tin e leve sospecho c’un mandatario y/of parlamentario di e gabinete ta sospechoso di cualkier investigacion, e persona concerni mester entrega su retiro y e minister president lo baha e gobierno. Lo aplica esaki awor of Aruba tin mas cu un dozijn di avestruz como gobernante?,” Kelly ta puntra.
E ta consciente cu e probabilidad ta nulo si mira con den varios oportunidad anterior, esey no a sosode tampoco. E palo ta bon pa bati tur otro partido cu ne, pero e ta disparce ora cu ta trata di nan mes. Ta bisto pa e hoben politico cu Aruba mester di gobernante mas serio y cu ta tempo pa renoba e compromiso cu nos mes y cu nos pais.
Ademas di ley actual pa tene nos gobernantenan skerpi y integro cu ta fiha retiro den eventualidad cu señal’e como sospechoso. Ta ora pa Parlamento mes tin un rol mas activo den haci uzo di su arma pa salvaguardia democracia y integridad cu un encuesta parlamentario.
Dennerich Kelly no ta di acuerdo cu esunnan cu ta bisa cu ta imposibel pa mehora politica na Aruba. E ta admiti si cu tin hopi trabou pa haci. Nos mester ta dispuesto pa dobla manga y haci’e, pasobra ser integro no ta algo exclusivo pa e politico, e ta toca nos tur. Cada ciudadano mester haci e compromiso pa traha riba integridad y implementa esaki pa cu su mes sea na pia di trabou, fundacion, organisacion, club deportivo y partido politico.