Temporada di yobidaTin su peliger pa salud publico

ORANJESTAD, Aruba – 10 juni 2024: Tur aña di nobo for di luna di juni pa december nos conose como lunanan di yobida of temporada di horcan. Pa algun esaki ta un bendicion, pa salud publico esaki por ta un peliger.

Yobida ta nifica bida y cu bida tambe e posibilidad pa sangura brui y ocaciona brote di malesanan transmiti pa sangura manera Dengue, Chikungunya y Zika. Pa evita cu Aruba por enfrenta brote di un di e malesanan transmiti pa sangura manera a sosode den pasado, ta importante pa comunidad completo pone atencion. Sangura mester awa pa por pone su webonan. Si cada persona percura pa rond di su cas no tin awa para despues di cada yobida, hunto nos por mantene e cantidad di sanguranan rond di nos isla abou y asina tambe reduci e cantidad di sanguranan cu por transmiti malesa.

Con nos por haci esaki?
• Tira afo of warda tur obheto cu por retene awa innecesariamente paden y rond di cas, scol y trabou. Por ehempel scoter bou mata, tire, co’i hunga pafo, vas cu mata of flor y mas.
• Tapa tur awa para cu tin proposito manera e.o, pa muha mata of duna bestia tur dia. Por ehempel hemchi bou erco of bari cu awa di yobida y mas. Ta extra alerta riba awa para cu proposito di bida pa mata of mascota por ehempel vas cu mata of flor, baki awa di bestia, vijver cu mata di lili y mas.
Di dos (2) paso ta proteha bo mes pa bo no haya un malesa transmit pa sangura door di:
• Bisti paña cu manga y pia largo durante oranan di atardi pa anochi.
• Uza repelente contra sangura riba cuero cu no ta cubri cu paña.
• Den espacio pafo di cas, cende un mecha of uza bela contra sangura.
• Cera porta y bentana di cas prome cu bira scur of uza screen.
• Evita di bishita areanan unda bo sa cu tin hopi sangura.
• Spuit paden di cas, camber, oficina y areanan cu bo ta frecuenta regularmente cu producto pa mata sangura.
Di tres (3) paso ta proteha otronan rond di bo ora cu bo tin un malesa transmiti pa sangura, esaki bo ta haci door di evita pa bo wordo pica pa sangura.
E sintomanan di malesanan transmiti pa sangura ta entre otro:
• Keintura.
• Dolor di cabes.
• Biramento di stoma y sacamento.
• Dolor di weso, joints y musculo.
• Dolor di wowo.
• Rash riba curpa.
Si bo ta presenta e sintomanan aki, consulta bo dokter di cas.
Si bo persona ta sinti hopi molester di sangura, GKMB ta conseha pa haci un bon inspeccion rond di cas y elimina tur awa para. Si despues di haci inspeccion ainda e molester ta continua, por yama GKMB na 5855533 pa informa.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw