Lider di fraccion AVP, mr. Mike Eman:Necesidat Urgente pa Subsidio Adicional pa Fundacionnan

E Fundacion pa Personanan cu Limitacion Intelectual Aruba (SVGA) a haci un yamada urgente na Gabinete Wever-Croes pa un subsidio adicional pa por cumpli cu e obligacionnan di nan CAO y pa garantisa e continuidad di cuido na ciudadanonan vulnerabel. Desde juli 2024 lo ta ahusta e salarionan di empleado público y “gelijkgestelden”, pero ainda no tin claridad si e fundacionnan tambe lo ricibi subsidio adicional pa e mesun ahuste.
Durante e periodo di COVID, e fundacionnan a wordo trata como “gelijkgestelden” y a corta directo riba nan subsidio y cu a afecta e salarionan di e empleadonan. Awor no tin claridad riba e aumento di subsidio, lo cual ta hopi inhusto. Si SVGA no recibi subsidio adicional esaki lo tin consecuencia grandi pa e fundacionanan.
Desde mei 2024, SVGA ta pidi atencion for di e Gabinete Wever-Croes pa e problematica grave aki, pero te awor no a haya ningun contesta di Ministernan di Gabinete Wever-Croes. Siman pasa, SVGA nan a manda un carta cu un copia na e Parlamento, y awor nan ta oficialmente bati alarma. Sin e ahuste aki, SVGA lo no por sigui cu su tarea publico di cuido na personanan cu limitacion. Tin hopi nerviosidad entre e empleadonan riba e tema aki y tin urgencia pa claridad pa por restora paz.
Parlamentario y lider di oposicion Mike Eman a hasi preguntanan na e Minister-President relaciona cu e situacion aki. Eman a pone énfasis riba e urgencia di e situacion y e necesidat pa un reaccion rapido di e gobierno. “No ta aceptabel cu ainda no tin claridad riba e subsidio adicional pa fundacionnan, mientras cu e costo di bida ta sigui subi,” Eman a bisa. Pa 2024, SVGA tin mester minimalmente Afl. 150.000 subsidio adicional pa cumpli cu e obligacionnan di e CAO. Pa 2025, e costo adicional lo ta minimalmente Afl. 600.000 pa salarionan, compara cu e montante actual di subsidio. E suma aki no ta tuma den cuenta e aumento di gastonan di operacion pa cu a aumenta cu inflacion, lo cual ta significa un suma adicional pa 2025 cu ta trece e suma necesario na Afl. 720.000 adicional. Esaki ta necesario pa garantisa e cantidad di cuido cu ta wordo duna actualmente.
Eman a haci pregunta specificamente si den e prespuesto di 2024 ta tuma na cuenta e sumanan adicional cu ta nesesario pa fundacionnan manera SVGA. “Gobierno a tuma contacto cu otro fundacionnan pa evalua nan situacion financiero? Kico ta e deficitnan y e sumanan adicional cu ta nesesario pa e fundacionnan aki?” Eman ta puntra den su preguntanan parlamentario.
Eman tambe a referi na e contexto histórico y e importancia di e continuidad di cuido. “Nos fundacionnan ta brinda servicio esencial na e ciudadanonan mas vulnerabel di Aruba. Ta crucial cu e servicionan aki no wordo comprometi pa falta di financiamento. Gobierno mester asegura cu e subsidionan ta suficiente pa enfrenta e costo creciente y inflacion,” Eman ta enfatisa.
Eman ta pone enfasis tambe riba e claridad cu mester tin pa e fundacionnan por confia riba financiamento rapido y adecuá. Lo tin consecuencia serio pa e clientenan y e empleadonan si no tin suficiente subsidio disponibel. SVGA ta den un situacion dificil, hunto cu varios otro fundacionnan cu ta brinda servicio esencial na ciudadanonan vulnerabel.
AVP y Mike Eman ta sigui defende e mas vulnerabelnan den sociedad y ta haci un yamada urgente riba gobierno pa tuma accion rapidemente. “Ta hopi importante cu e gobierno tuma un desicion positivo y rapido pa garantisa e cuido di nos ciudadanonan vulnerabel y empleadonan cu ta haci e bunita trabao aki,” e lider di oposicion, mr. Mike Eman, ta accentua.