‘Como un paso pionero den Caribe y dunando atencion na desaroyo duradero’A.T.A. ta facilita curso di sostenibilidad na operadornan di tour y agencia di waf

Aruba Tourism Authority (A.T.A.) recientemente a facilita curso virtual di sostenibilidad destina pa operador di tour y agencia di waf como un paso pionero den promove turismo sostenibel na Aruba. E iniciativa aki, realisa den colaboracion cu ‘Aquila Center for Cruise Excellence’, ta marca Aruba como e prome destinacion pa completa participacion den tal programa di entrenamento. Dos organisacion, esta A.T.A. como Aquila cu ta miembro orguyoso di Florida Caribbean Cruise Association (FCCA).

E curso, dirigi pa e entrenador global Ambra Attus di e ‘Aquila Center for Cruise Excellence’, ta diseña pa suministra participantenan cu e conocemento y herment necesario pa practica y mehora excursion y experiencia di e bishitante na un manera sostenibel. Ta importante pa menciona cu e curiculo ta alinea cu e criteria di ‘Global Sustainable Tourism Council (GSTC)’, y ta duna socionan local e capacidad pa adopta mentalidad, strategia, y habilidadnan cu ta enfoca riba experiencia autentico, impactante, y sostenibel pa e bishitantenan di e mundo di turismo crucero pero tambe di turismo en general, esaki mientras ta crea memorianan inolvidabel.

Temanan Principal cu a keda presenta durante di e curso a inclui:

• Comprondemento di e tema di sostenibilidad y su relevancia/ importancia pa e industria di turismo
• Tendencianan actual den e industria crucero
• E papel importante di socionan local den asegura un experiencia sostenibel na e destinacion
• Guia y recomendacion dirigi na crea experiencianan sostenibel pa e bishitante
• Pasonan pa logra certificacion di ‘Global Sustainable Tourism Council (GSTC)’

Como miembro di GSTC desde 2018, entrenador Ambra Attus ta brinda hopi experencia den biahe y turismo. Su pasion pa turismo sostenibel, hunto cu su experiencia extensivo den entrenamiento y entrenador den sostenibilidad, ta un parti instrumental den crea experiencianan cu proposito pa lineanan di crucero den Caribe.

Mas di 40 participante for di varios operador di tour y agencia di waf a atende na e dos dianan di sesion virtual, y a inclui ehempelnan interactivo cu a permiti pa un participacion activo y aplicacion di e concepto presenta durante di e sessionan.

Aruba ta orguyoso di ta e ‘forefront’ pa cu e entrenamiento aki den Caribe. E curso aki ta representa A.T.A. su compromiso pa proteha y conserva nos medio ambiente y naturalesa mientras ta proporciona experiencianan excepcional na e bishitante. Nos ta sumamente contento pa mira con nos socionan local lo implementa e practicanan sostenibel aki den nan operacion y ofertanan di tour. Un pabien na cada un di nan!

Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta para pa un balanse entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balanse menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.