Aruba ta bira e anfitrion pa conferencia di PAMAC Cruise Summit den 2025‘Contando cu presencia di ehecutivonan top den e industria’
Ministerio di Turismo, Aruba Tourism Authority (A.T.A.), y Aruba Ports Authority (APA) ta anuncia cu Aruba oficialmente ta bira e anfitrion pa PAMAC Cruise Summit 2025, un di eventonan mas importante y renombra pa cu e mercado di Norte America como Latino America pa cu e industria crucero. Na 2017, Aruba a fungi como e anfitrion di PAMAC (Platinum Associate Member Advisory Council) Summit na un manera exitoso, y ta sumamente contento pa un biaha mas yama bonbini na e evento prestigioso aki na 2025.
E anuncio a wordo efectua durante e PAMAC actual na Montego Bay Jamaica. CEO di A.T.A. Ronella Croes, CEO di APA Marc Figaroa conhuntamente cu Patrick Melchiors, Mario Arends y Monica Bos a presenta e informacion aki, cu a inclui palabranan di bonbini di parti di Minister di Turismo.
E conferencia di PAMAC ta un plataforma popular, y ta conta cu ehecutivonan halto den e industria di turismo crucero, ambos di e lineanan crucero como tambe otro socionan den e industria. Organisa pa e Florida-Caribbean Cruise Association (FCCA), e evento aki ta dedica exclusivamente na ehecutivonan di linea crucero cu ta ser considera como miembronan platinum di FCCA. E evento aki lo ofrece e oportunidadnan ideal pa cada destinacion participante resalta e desaroyonan reciente.
Durante añanan anterior, Aruba a conoce diferente construccion y renobacion cu a conduci na aumento den popularidad y competividad como un destinacion turistico di primera clase. Un aspecto clave cu e PAMAC Cruise Summit 2025 lo trece cu ne pa Aruba ta e oportunidad pa demostra e desaroyo recien, actividad, y excursion disponibel riba e isla. Ademas, e conferencia lo enfoca riba varios topico importante cu ta inclui; atraccion di barconan chikito y mas di luho, como tambe atraccion di barco den temporada abou.
E meta di e iniciativa aki ta pa mehora e experiencia na Aruba y pa promove un crecemento sostenibel den e industria crucero. Sostenibilidad ta keda un tema central den e sector crucero, y e conferencia aki lo pone enfasis riba importancia den alinea strategianan di Aruba cu e industria crucero globalmente.
Un conferencia di PAMAC Cruise Summit tipicamente ta dura dos pa tres dia, y ta inclui un variedad di actividad manera reunionnan, funcion, y excursion. E dianan inicial ta dedica na facilita interaccion entre e ehecutivonan di crucero, socionan local, y representantenan di gobierno. E interaccion aki ta ser considera como crucial prome cu ehecutivonan di crucero topa cu e miembronan ‘platinum’.
Aruba como anfitrion di PAMAC Cruise Summit 2025 ta un testimonio di e compromiso di Aruba pa cu excelencia den e industria di turismo. Ministerio di Turismo, Aruba Tourism Authority (A.T.A.), y Aruba Ports Authority (APA) ta den gran anticipacion pa asina por accentua tur locual cu Aruba tin pa ofrece, esta ofertanan eleva y fortificacion di relacion firme cu ehecutivonan den línea crucero.
