Dia Mundial pa Combati Desertificacion y Secura extremo 2024: Nos Tera, un Legado pa Futuro

ORANJESTAD – Pa conmemora e di 30 Convenio pa combati Desertificacion y Secura, Nacionnan (UN) a oficialisa cu e observacion di Dia Mundial di Desertificacion y Secura extremo (Desertification & Drought Day) ta riba dia 17 di juni. Nacionnan Uni ta pone enfasis riba e importancia di solidaridad internacional pa atende cu e retonan di secura extremo y degradacion di suela, pues desertificacion. E tema pa 2024 ta “Nos Tera, un Legado pa Futuro”. ‘E tema aki ta reconoce e rol crucial cu e tera ta hunga den nos bida. For di apoya e ecosistemanan y biodiversidad te na sostene nos economia y comunidad. E meta ta pa encurasha transformacion pa un mundo cu suelanan mas sano y di biodiversidad halto.
Directie Natuur en Milieu (DNM) a bin ta tuma nota di nos suela y e temporada di secura ta uno extremo. Plantamento of mantene matanan na bida ta un reto. Tambe, ora tin yobida e awacero ta core y e tera no ta haya tur oportunidad pa absorba e awa. Esaki ta pone cu e suelo no tin suficiente humedad/awa pa provee matanan ora planta.
Kico ta desertificacion? E ta e proceso di degradacion di tera den zonanan arido, semi-arido y medio humedo pa seco. E ta un menasa serio pa medio ambiente y desaroyo humano causando impacto negativo riba mas di 3 mil miyon di hende. Secura ta un otro menasa grandi cu ta contribui na degradacion di suelo (desertificacion). Cambio climatico ta aumenta e frecuencia y severidad di secura, poniendo presion riba recursonan natural cu ta depende di tera y awa.
E comunicado aki ta haci un yamada pa traha hunto pa combati e degradacion di suela y secura. Door di cooperacion y asistencia mutuo, nos por promove manehonan sostenibel di tera, aumenta capacidad di adaptacion na e cambio climatico, y sigura e futuro pa hende.
Aruba mester traha na combati e degardacion di suela esta desertificacion
Si, ta berdad cu Aruba no ta clasifica como un area di desierto, pero nos isla ta exponi si na efectonan di e desertificacion debi na su clima semi-arido y awacero inconsistente. Nos por atende cu e retonan aki door di implementa manehonan manera:
• Maneha eficazmente e recurso awa pa conserva esaki.
• Proteccion y restauracion di vegetacion pa reduci erosion di tera.
• Promove practicanan di agricultura sostenibel cu ta conserva salud di tera.
• Stimula desaroyo di suelo cu material organico.
Trahando hunto pa un futuro mas berde
Dia di Deserticifacion y Secura ta un recordatorio importante di e necesidad pa traha hunto pa un futuro mas berde y un biodiversidad saludabel. A traves di accion colectivo y solidaridad internacional, nos por mitiga e efectonan di e degradacion di suela y secura extremo y crea un mundo mas sostenibel pa futuro generacion.
Pa mas informacion tocante Dia Mundial di Desertificacion y Secura, por fabor bishita e website di Nacionnan Uni: https://www.un.org/en/observances/desertification-day.