Partido MEP: RODYMAR GEERMAN TA FELICITA MINISTER ROCCO TJON CU E APERTURA DI E OPERATION COMMAND CENTER
Determinacion y esfuersonan haci pa trece mas siguridad riba nos isla
ORANJESTAD – Rodymar Geerman, candidato hoben di Partido MEP, ta felicita Minister Rocco Tjon y Cuerpo Policial di Aruba cu e apertura di e Operation Command Center na Savaneta. “Determinacion y esfuersonan haci pa trece mas siguridad riba nos isla ta conduci na logronan cu lo garantisa mas trankilidad no solamente di nos bishitantenan sino tambe pa cada ciudadano di nos pais”, Rodymar a expresa.
Manera ya Minister Rocco Tjon a duna di conoce, e Operation Command Center di Aruba ta esun mas moderno di e region, cu monitoreo di 258 camera instala den centro di San Nicolas, den area di hotel y pronto den centro di Oranjestad y asina brinda un miho siguridad riba nos isla.
E camaranan ta traha cu un software hopi moderno basa riba inteligencia artificial, unda por reconoce un number di auto, e color di e auto y color di paña di un persona. E sistema aki di “real time” lo asisti Cuerpo Policial y demas departamento hudicial no solamente pa resolve crimennan cometi, pero tambe preveni y reduci esaki.
Cuerpo Policial di Aruba su tarea primordial ta pa garantisa siguridad y Gobierno lo sigui inverti den tecnologia pa asina sigui preveni y combati criminalidad na Aruba.
