Parlamentario Alvin Molina (MEP): Camara pa siguridad, no pa redashi.
Siguridad den centro di San Nicolas ta keda un punto di preocupacion. Sigur si nos mira e prostitucion ilegal, atraco, kiebro y hortamento di auto cu ta tumando luga, unda cu tanto nos local- y turistanan ta bira victima. E ta un preocupacion cu mester y merece di haya atencion. E ta hopi complica pa resolve, paso tin varios stakeholder y interes cu ta hunga un rol. Door di esaki mi a haci un peticion via un mocion na Gobierno di Aruba pa institui un comision cu ta consisti di tur stakeholder entre otro, Sanibar, SNBA, comeriante, habitante y profesional cu tin conocemento di โcity planningโ pa presenta un plan fiho y concreto di con por drecha e area aki. Nos por mira cu nos Minister di Husticia a tuma varios accion, unda cu el a duna atencion na e polis di bario, cual tin un efecto positivo riba siguridad di cualkier bario incluso centro di San Nicolas. Tambe camara toezicht ta bira un realidad aki den e centro y bisindario di San Nicolas. A instala varios camara y e camara room ta cla pa cuminsa opera. E no ta pa biba bida di hende, a tene cuenta cu ley di privacidad, pero si esaki por duna un efecto positivo riba soluciona y prevencion di crimen. Unabes cu comete un crimen por resolve esaki hopi lihe danki na e camaranan y sigur esaki lo tin un efecto positivo riba e siguridad den centro di San Nicolas y bisindario.
