Joost Meijs den su discurso di despedida AUA Airport ta un joya den Caribe cu merece sigui briya!

Durante siman pasa a organisa dos evento fantastico den e terminal nobo pa “US Departure” na Aruba (AUA) Airport, cu e prome evento dedica exclusivamente pa empleadonan di Aruba Airport Authority N.V. (AAA) y di dos evento tabata pa tur stakeholder den aeropuerto y e industria completo di aviacion. Hunto mas di 400 invitado tabatin e oportunidad pa yama ayo na e CEO saliente di AUA Airport, esta Joost Meijs.

Durante e di dos evento a conta cu presencia di Gobernador di Aruba, e Prome Minister, Minister Danguillaume Oduber, Miembronan di Parlamento, autoridadnan na aeropuerto y tur partner y stakeholders den e industria di aviacion.

Durante ambos evento tabatin varios discurso y a probecha pa haci un presentacion riba desaroyo di e proyecto di Gateway 2030. Invitadonan tur a gosa di e intercambio di regalo, bon cuminda, bon atendencia di e invitadonan y sin lubida un dushi atmosfera.

“Si, manera priminti, ta tempo awo pa mi ultimo palabranan. Mi ta corda cla e discursonan di bonbini cinco aña pasa, duna door di Prome Minister Wever-Croes, Minister Oduber y di e Presidente di Hunta di Supervision di e tempo ey, Marion Kan, den cual tur tabata basta similar den hisa e presion riba e ekipo di AAA y riba mi pa cumpli cu loke nan ta desea: Ehecuta e proyecto Gateway 2030 di un forma organisa, controla y bon maneha”, asina Joost Meijs a bisa den su discurso di despedida.

Tabata apropia cu e despedida di Joost Meijs a tuma luga den e terminal nobo, recien entrega, unda pasaheronan cu ta biaha pa Merca lo cuminsa uza dentro di poco, como parti di e Fase 1A di e proyecto Gateway 2030. Na comienso di su trabou como CEO, esaki a bira su tarea di mas importante; implementa e inversion grandi den e terminal di aeropuerto y e parti infrastructural bou di e nomber Gateway 2030. E prome fase, esta e sistema nobo y moderno di maneha maletanan, construccion di un area di check-in nobo pa vuelonan pa Merca awo ta cla y entrega. E fase ey tabata envolvi un inversion di mas cu $140 miyon y ehecuta door di varios compania di construccion local. Construccion di e di dos fase di Gateway 2030, esta e “hold room” y “gate areas” pa por acomoda mas avion riba rampa, ta premira pa cuminsa den e di dos mita di aña 2024.

“Awe, cu celebracion di e entrega di e prome fase di Gateway 2030, e ekipo completo di AAA a demostra cu nan por ehecuta e programa Gateway 2030. Damas y cabayeronan, pa ta modesto, Aruba Airport tin un team fantastico y ta danki na nan bon trabou y nan enorme compromiso hunto cu mi coleganan den gerencia, cu e aeropuerto a bira asina exitoso den implementa e strategia nobo di haci negoshi”, asina Joost Meijs a continua bisando.

Lamentablemente, AUA Airport no ta cla ainda pa anuncia kende lo ocupa e puesto di CEO awo. E proceso ta den bon man di Royal Schiphol Group, e hunta di supervision y Gobierno di Aruba como doño; tur ta convenci cu pronto nan lo scoge e miho candidato pa ocupa e funcion di CEO.

Na final di su discurso, Joost Meijs a gradici Gobierno di Aruba, e hunta di supervision, e accionista, Royal Schiphol Group y su coleganan pa nan confiansa, yudansa, nan comentarionan critico pero mas cu tur cos, pa nan amistad profesional y pa simplemente ta su colega. “Mi ta convenci cu boso tur lo sigura cu aeropuerto ta sigui riba e bon caminda. Aruba y e aeropuerto ta un joya den Caribe y nan merece di sigui briya. Sigur lo mi haya boso falta hopi”, asina Joost Meijs a conclui.

Joost Meijs, CEO di Aruba Airport Authority N.V. (AAA) desde augustus 2019, awo ta bandonando nos isla despues di su termino di cinco aña. Durante su trabou, hunto cu e ekipo di maneho y empleadonan di AAA, a logra varios mehoracionnan den e ultimo añanan. Esakinan no ta inclui solamente e proyecto Gateway 2030, pero tambe e desaroyo di AUA Airport pa bira e aeropuerto mas sostenibel, sigur y bon prepara pa futuro, di henter Sur America y Caribe. Awendia, den forma consistente, AUA Airport ta inverti den su cuater pilarnan strategico: e desaroyo di su empleadonan, e calidad di su servicio y e infrastructura di aeropuerto, innovacionnan y oportunidadnan nobo, sostenibilidad y responsabilidad social.