Minister Maduro di Finansa ta informa:CAFT TA CONCLUI CU ARUBA TA CUMPLI CU TUR NORMA FINANCIERO DEN AÑA 2023

Trabou serio ta duna resultado concreto y positivo na bienestar di Pais Aruba

Recientemente e colegio di supervision financiero CAFT a publica nan opinion riba e cifranan di e ultimo kwartaal di aña 2023 manera cu Gobierno a publica den e Uitvoeringsrapportage URK 4. En corto, CAFT ta conclui cu Aruba ta cumpli cu tur norma financiero den aña 2023. Ta trata di un surplus di 1% di GDP of mas, gasto di personal bou di 479 miyon florin y debe cu ta baha.

Surplus mas grandi cu 1% di GDP
Un norma financiero cu Aruba a acorda cu Hulanda pa mehora nos finansa publico ta, pa e sector colectivo por tin un saldo financiero di un surplus di 1% di GDP of mas. Den aña 2023, debi na crecemento economico grandi, prudencia den presupuesto y diciplina presupuestario, a logra un resultado financiero positivo cu a hiba na un surplus di 4% di GDP pa e sector colectivo di Aruba. Cu esaki Aruba ta cumpli cu e norma financiero pa por tin un surplus di mas di 1% di GDP den Presupuesto 2023.

Gasto di personal bou 479 miyon florin
Den aña 2023, e gasto di personal mester keda bou di 479 miyon florin. Asina mes cu Gobierno den aña 2023 a bay over na paga 100% di salario na e empleado publico, e gastonan di personal a suma 467 miyon florin kedando asina bou di e norma pa gasto di personal. CAFT ta remarca cu desde 2022 nan ta mira cu gasto di personal ta keda baha cumpliendo asina cu norma pa keda baha gasto di personal.

Debe ta baha conforme plan
E quota di debe a baha te na 79% di GDP den aña 2023, un bahada di 12 punto di porcentahe compara cu aña 2022. Cu esaki Aruba ta bon riba rumbo pa cumpli cu e norma di un quota di debe di 70% di GDP den aña 2027 y un quota di debe di 50% di GDP den aña 2039. Pues e debe di Aruba ta bahando conforme plan.

CAFT cu elogio pa Aruba
Den e raport riba e cifranan di e ultimo kwartaal di aña 2023, CAFT ta duna elogio na Gobierno di Aruba pa e resultado financiero positivo. E cifranan di e ultimo kwartaal di aña 2023 por wordo mira riba www.gobierno.aw y e raport di CAFT por wordo mira riba www.cft.cw. Minister Maduro ta gradici tur instancia y persona cu ta haci esfuerso grandi pa mehora e finansa publico di Aruba. Trabou serio ta duna resultado concreto y positivo na bienestar di Pais Aruba.