Prome Minister Evelyn Wever-Croes:

Faltando dos dia pa Dia di Himno y Bandera,
PROME MINISTER TA BISHITA AYO KLEUTERSCHOOL Y MARIA GORETTI DEPENDANCE

Faltando dos dia pa nos dia nacional, Dia di Himno y Bandera, Prome Minister Evelyn Wever-Croes ta sigui cu su bishitanan cerca varios scol na Aruba. Un custumber cu ta yena Prome Minister cu alegria y emocion. Diaranson mainta, Prome Minister a bishita Ayo Kleutershool y klasnan di scol basico, Maria Goretti Dependance. Prome Minister a wordo ricibi door di Cabesante Juffrouw Mirla de Cuba y a ricibi un bunita ramo di flor di e alumno Eduard Flanegin.

Prome Minister a expresa cu esaki tawata un mainta hopi bunita na unda cu hopi entusiasmo e muchanan a canta nos dushi himno Aruba Dushi Tera y a hisa nos bandera. Despues a sigui un programa hopi bunita cu presentacion di canto, poësia y un bunita baile di sinta.

Prome Minister a bishita tur e klasnan y a interactua na un manera hopi ameno cu e muchanan contando nan e storia di nos dia nacional y na final Premier a duna un mensahe na e muchanan pa nan sigui haci tur nan best na scol pa nan ta e miho di nan mes ora nan bira grandi.

E prome mandatario di nos pais a combersa tambe cu e cabesante Juffrouw Mirla de Cuba pa scucha mas di e scol y kico ta e plannan pa e scol. Juffrouw de Cuba a gradici Prome Minister pa su bishita y a expresa cu nan a prepara cu hopi dedicacion pa e bishita di Premier ta special pero tambe pa e muchanan gosa.

“Realmente hopi bunita di mira con e muchanan ta prepara pa e dia importante aki y combersando cu nan, bo ta mira cu nan ta carga celebracion di nos Himno y Bandera den nan curason”, Prome Minister a expresa.

Prome Minister ta gradici Juffrouw Mirla y demas docentenan tambe pa e bunita recepcion y oportunidad y specialmente pa e dedicacion na nos muchanan. “Ta hopi bunita pa wak con nan ta lanta cu e amor pa Aruba. Esaki ta algo cu mas y mas nos ta mira den nos muchanan”, Prome Minister a remarca.