Parlamentario di AVP, Arthur Dowers: Gabinete Wever-Croes ta admiti cu AVP si ta inverti den pueblo

For di e reunion publico pa tratamento di presupuesto supletorio, un di e aspectonan cu mas a resalta pa parlamentario di Partido di Pueblo Arubano, AVP, Arthur Dowers ta cu finalmente gobierno actual ta admiti cu antes tur cen ta bay pa inversion. Y en berdad, dia cu Gabinete Wever-Croes I a sinta, 320 miyon florin a bay pa cierto comerciante, na luga di bay pa pueblo.
Finalmente Gabinete Wever-Croes II ta admiti cu AVP a inverti, cu e inversionnan aki a pone economia crece, mientras cu nan a bati pueblo cu medida, y p’esey mes ta sinti cu nan tin e obligacion moral di duna algo bek na pueblo den forma di indexering; convenientemente den porta den campaña electoral.
“Pa shete aña a castiga bo, a kita remedi, a dal bo cu aumento di prijs di awa y coriente door di mal maneho di friends & family den companianan estatal, pero esey si nan no ta drecha bek. Ki ora cu ta tin un of mas minister den exterior,” asina Dowers ta declara.
E ta continua indicando cu gobierno ta tira santo den bo wowo paso ta kita 100 florin for di e ciudadano y regal’e 10 bek y bisa bo cu bo tin cu bati man pa nan. “Pasobra ta bin un eleccion, ta sinti cu por fin mester duna pueblo bek loke a kita nan.”
Mientrastanto, segun Dowers, ta sigui cu metemento den husticia. Tin indicacion hopi cla, un biaha mas y te hasta den sala di corte, cu nomber di prome minister a cay pasobra e lo a mete pa persecucion di funcionario halto di gobierno. A mira esey for di comienso di nan mando cu un keho falso riba contrincantenan, malgastando fondo publico djis pa satisface nan capricho politico.
Como parlamentario di AVP, Dowers ta adverti cu mester ta prepara pasobra nan si lo bin cu investigacion real. Por ehempel unda e 320 miyon florin di pueblo a bay. Esaki ta placa cu por a bay pa subsidia enseñansa y cu no mester paga schoolgeld halto, ta placa cu por a bay den AZV pa pensionado no mester paga pa remedi of pa aumenta e poder di compra di e ciudadano.
Dowers: “Nos kier sa ken a cobra e comision. Un hende mester a strica un 30 miyon di e pueblo y a tira 320 miyon di Aruba afo. Nos kier sa ken e ta y nos kier wak ken ministerio publico lo keda sin investiga. Pasobra si bo kier di perhudica un pueblo, esey ta loke ta perhudica un pueblo di berdad.”