Leonardo Figaroa: Presupuesto supletorio ta haya dikke onvoldoende y minister di finanza nul kom nul na solucion

E ta tristo pa wak un minister resulta na atakenan personal ora e no por defende su maneho.
Yamando otro Parlamentarionan pa halado di coca of cualkier otro insulto ta demonstra su
arogancia y falta di competencia pa e function. Den mi opinion e minister di finansas di mas
malo cu pais Aruba a yega di haya. No solamente ainda nos debe nacional ta riba 5 biyon florin,
pero tampoco a demonstra madures politico pa implementa tur locual e la yena su boca cunele
durante e contienda electoral di 2017, Mega debe toch? Wel awe no tin un GIGA-debe y ainda
e ta demonstrando ningun solucion pa remedia e situacion. Su vision ta manera e mes a bisa,
NUL komma NUL.
Mientras cu minister-president a core firma un acuerdo pa introduci e Rijkswet Aruba financieel
toezicht (Raft) ta mustra cu esaki lo no sucede mas den e kabinete aki, pero lo bira e dolor di
cabes pa e siguiente gobierno bay deal cunele. Awe riba mesa tin algun proposicion pa cambia
e presupuesto pero manera Raad van Advies a hinca den nan conseho di 25 april 2024,
gobierno no por splica bon dicon nan ta tuma cierto decision, y den e nota cu nan ta presenta ta
‘schiet te kort’ na por brinda un splicacion cu ta bon sosteni door di argumento y hechosnan
valido.
Mi a expresa mi posicion na varios ocasion riba e tema di indexering, mi no lo ta e politico mas
popular, pero mi ta kere cu indexering aworakinan no tabata e momento. Gobierno y Partido
MEP prome cu contienda electoral kier purba tira santo den wowo di e empleadonan publico pa
asina nan lubida cu 12,6% a wordo reteni di nan durante pandemia y nunca mas lo nan mira e
placa aki bin bek.
Raad ta remarca lo siguiente
Den e aspecto di gastonan e prome aspecto critico ta e hecho cu gobierno no ta splica
exactamente e reparatietoeslag riba ki periodo exactamente e ta relaciona y con a yega na e
sumanan aki pa compensacion di e poder di compa. Tampoco no ta splica si pa e organonan
mas halto di estado y DOW e calculacionan ta mesun cos. Pesey ta wordo conseha pa brinda
un splicacion amplio riba e calculacionan aki. Minister di finanzas ta opta pa bay paga un di tres
compania 850 000 afls pa evalua e maneho di credito, dicon un compania mas kico ta e motibo
cu mester un compania adicional si ya tin 2 compania cu ta evalua esaki caba. Cas di cultura lo
recibi 4 miyon florin adicional sin cu esaki a wordo hinca den e presupuesto di 2024, den e caso
aki mi ta sostene e ponencia di Raad con gobierno ta prioritisa projectonan pa renovacion,
mientras cu e plana di RWZI a wordo neglisha completamente pa awo pasa pa un compania
independiente cu ainda no lo cuminsa recibi fondo, pues gobierno tampoco a opta pa
presupuesta fondo pa DOW sigui cu mantencion te ora e compania cuminsa recibi placa pa por
continua e maneho. No tin splicacion ademas riba e necesidad aworakinan pa renoba cas di
cultura. Minister ursel arends a crea un directie nobo di maneho di adultonan mayor cu lo recibi
4,9 miyon florin segun e Deltaplan Ouderen Aruba (2023-2030) e plan aki ta describi algun
meta pero no ta splica con lo haci uso di e fondo pa realisa e vision aki. No ta clarifica cuanto
gasto e roadmap aki lo costa total y con e 4,9 miyon lo contribui pa realisa tur e metanan aki.
Ademas splicando cuanto gasto adicional lo mester haci pa asina pa realisa tur e metanan aki,
sea structural of incidental. Lo bay huur hydrantenan di WEB pa departamento di brandweer cu
lo conduci na un adicional 1,1 miyon florin, casi 40% adicional y durante 2023 gobierno a
presupuesta no mas cu 1,9 miyon pa es motibo Raad ta puntra dicon un subida drastico den e
fondo presupuesta pa huur di e hydrantenan, kico ta ocasiona e subida drastico aki? E subida
aki ta incidental of structural? Y ki otro elemento ta hunga un rol den e redoblacion di e
gastonan di brandweer compara cu 2023.
Mi lo por sigui bay pero papel lo no yegami y ainda mi no ta den Parlamento, pero pronto cu bo
voto mi lo por haci tur e preguntanan aki y mas. Sperando tambe pa por contribui na un cambio
berdadero di e rumbo di pais aki. Finalmente, mi por conclui cu e promesa grandi di bon
gobernacion y transparencia cu sra evelyn wever croes a priminti cada momento den cada
conseho ta wordo bari for di mesa, incimplimento, incluyendo e normanan nobo di e ordenansa
nacional di control financiero (laft) y aplicacion di terminonan manera meevallers y
schuldreductie a la intrepretacion di mep pero no ley. Sin lubida cu e pronosticonan di
departamento di Economia tampoco no ta esunan mas recien usa. Manera semper gobierno
nunca por brinda un aplicacion cla y bon sosteni cu cifra y otro hechosnan controlabel pa fungi
como sosten pa nan maneho.
Aruba mester un otro direccion, mi ta spera e direccion correcto cu PDP den e siguiente
kabinete