Prome Minister Evelyn Wever-Croes: PA LOGRA E META DI DIVERSIFICACION DI E ECONOMIA DI ARUBA, MESTER CREA MAS OPORTUNIDAD COMERCIAL CU OTRO PAISNAN

Prome Minister a reuni cu Holland House na Panama

ORANJESTAD – Durante su bishita na Panama pa instalacion di e presidente nobo, Prome Minsiter Evelyn Wever-Croes tabata tin e oportunidad di reuni cu representantenan di sector priva. Un di e reunionnan tabata cu Holland House, cu ta un organisacion cu ta representa e comerciantenan Hulandes y di Aruba, Corsou y Sint Maarten na Panama.

Durante e reunion, a toca varios tema di cual un hopi importante ta e oportunidadnan economico cu por tin entre Aruba y Panama. Gobierno ta aplicando un strategia agresivo pa crea mas pilar economico pa pais Aruba, pero esaki por ta posibel solamente si tin mas oportunidadnan comercial cu otro paisnan.

Tambe Prome Minister a splicanan riba e vision economico di gobierno cu ta enfoca riba seis area importante, cu ta entre otro, diversificacion di turismo, agricultura, un hub logistico, economia di conocemente y di creatividad y economia relata na e awanan cu tin rond di pais Aruba.

Otro aspecto importante pa atrae inversionistanan ta con Aruba ta para financieramente y economicamente. Aki Prome Minister a informanan cu danki na turismo, cu ta e pilar economico mas grandi di pais Aruba, na e stabilidad politico cu tin, e stabilidad di corte di husticia, y na e oportunidadnan cu tin den e mercado laboral cu a conduci na un rebaho den e porciento di desempleo, Aruba ta financieramente y economicamente stabiel.

Prome Minister a indica di ta sumamente satisfecho cu e reunion cu Holland House, na unda por a nota un interes grandi pa Aruba. Pa cuminsa cu e proceso pa cu lasonan comercial cu Panama, Holland House ta organisando un ‘handelsmissie’ pa trece comerciantenan di Aruba y Panama mas cerca di otro.