Parlamentario Marco Berlis (MEP):
Pabien aruba cu nos celebracion di nos dia di himno y bandera
Laga nos sali y celebra e dia aki na grandi!
Dia 18 di Maart ta e dia di Himno y Bandera di Aruba. Prome cu tur cos mi kier a desea pueblo di Aruba masha pabien cu e dia aki! Riba e dia aki nos tur ta conmemora y celebra e logro aki na grandi, na unda nos a yega na nos mesun bandera y nos mesun himno nacional. Nos por ta orguyoso di esaki, pasobra ambos a duna nos un identidad unico como pueblo Arubano, den e Reino.
Riba e dia aki nos pueblo ta conoci pa sali gosa y celebra e dia di fiesta aki, cu ta parti di nos cultura. Lo tin hopi actividadnan tur rond di nos isla den cada bario. Sigur un y tur lo por gosa di nos cumindanan crioyo, musica tipico, weganan tradicional, y diferente otro actividadnan cultural.
Laga nos ta agradecido y probecha e tempo bunita aki, den cual nos por sali atrobe despues di un pandemia cu a mantene nos leu di tur actividad, pa asina nos por celebra y festeha esaki manera nos ta custumbra. Aworaki nos ta liber pa disfruta hunto cu nos famia y amigonan y pasa un tempo dushi. Laga nos haci esaki di un forma responsabel y consciente.
Masha pabien pueblo di Aruba!
