Partido MEP: PARTIDO MEP TA PRESENTA SU LOGRONAN Y VISION DEN ENCUENTRO DI ‘BAN TOPA’

Den un sala completamente yen na edificio di ATIA na Dakota

Diadomingo 7 di juli, a marca un otro encuentro exitoso y interactivo di ‘BAN TOPA’. Lider di Partido MEP Evelyn Wever-Croes y candidatonan di nos partido ta gradici tur esnan cu a asisti na e encuentro aki y a haci esaki uno exitoso un biaha mas.

E edificio di ATIA na Pedro Gallegostraat 6 na Dakota tawata yen un biaha mas unda cu Lider di Partido MEP y candidatonan di nos Partido, Minister Xiomara Maduro, Minister Glenbert Croes y Lider di Fraccion di MEP den Parlamento Hendrik Tevreden ademas di a duna discurso y splicacionnan relevante riba temanan actual, a duna informacionnan tocante logronan di nos Gobierno y un biaha mas a reafirma e vision y determinacion comun di Partido Movimiento Electoral di Pueblo. Partido MEP ta sigui uni nos pueblo cu nos compromiso y dedicacion profundo pa sigui sirbi nos pais y crea un futuro prospero pa cada Arubano.

Lider di MEP a splica den lineanan grandi con Aruba ta para actualmente y a informa principalmente riba e trabounan cu su ministerio ta logrando. Lider di MEP a enfatisa cu ta importante pa informa pueblo y reflexiona kico tur Gobierno ta haciendo pa asina mustra, cu palabra y cu hechonan, cu Aruba mester di un Gobierno cu Movimiento Electoral di Pueblo MEP pa salvaguardia e futuro di nos yiunan.

Minister di Cultura y finansas a duna splicacion hopi amplio, cu cifra, riba finansas di nos pais y esfuersonan cu nos pais a haci pa logra para riba pia despues di e pandemia. Logronan cu a wordo elogia pa institutonan financierno internacional manera IMF y Fitch Ratings. Aruba ta riba e bon caminda. Pa completa su presentacion, Minister Maduro a elabora riba e logronan riba e tereno cultural.

Minister di Labor Glenbert Croes a duna un presentacion interesante unda cu el a mustra cu cifra con desempleo ta bahando, y kico tur Gobierno ta haciendo riba e tereno di labor pa sigura trabounan pa nos ciudadanonan y studiantenan tambe en particular. Minister Croes a enfatisa tambe cu salario minimo a subi cu 46%, casi dobbel durante maneho di Gabinete Wever-Croes, algo cu no a pasa desde 2006.

Por ultimo, Lider di Fraccion di MEP den Parlamento Hendrik Tevreden a elabora riba e importancia di Parlamento den e trabounan cu ta wordo haci pa progreso di Aruba. Parlamentario Tevreden a duna relato amplio di tur e trabounan cu a wordo haci particularmante pa e bario di Dakota y por bisa cu esaki a impresiona tur esnan presente.

Aruba ta para den un piek di posibilidadnan y hunto nos por logra mas pa nos pais. Laga nos avansa cu curashi y conviccion, vision y determinacion, na un solo compromiso, un solo meta, un solo proposito. Lider di MEP Evelyn Wever-Croes, den nomber di Partido MEP ta gradici tur cu a atende Ban Topa na Dakota y ta invita pueblo di Aruba di awo caba, na e siguiente ‘BAN TOPA’ den un bario na Aruba. “Laga nos sigui bini hunto, pa scucha di otro, pa siña di otro, y pa reafirma nos compromiso cu nos pueblo. Pasobra union ta nos forsa pa un Aruba mas fuerte y resiliente. Keda pendiente pa mas informacion di e encuentro aki. Nos compromiso ta continua”, Lider di MEP a remarca.