Prome Minister Evelyn Wever-Croes: UN TOTAL DI 212 ALUMNO DI EPB SANICOLAS A COMPLETA NAN ESTUDIO EXITOSAMENTE
“Aruba mester di futuro profesionalnan y mirando e cantidad di graduadonan ta yena mi di speransa pa un miho futuro”
ORANJESTAD – Diamars anochi na Renaissance Convention Center a tuma luga e ceremonia di graduacion di EPB Sanicolas, na unda un total di 212 alumno a gradua, pa un porcentahe di 93% di e scol. E grupo aki ta e prome graduadonan di e Arubaanse Beroeps Opleiding (ABO) MBO nievau 2, cu ta consisti di 3 sector, Unidad Servicio, Unidad Technico y Unidad Economia.
Unidad Servicio ta conta cu un total di 74 graduado, cu a completa nan estudio exitosamente pa bira un “host” profesional. Unidad Technico ta duna e alumnonan e oportunidad di siña tur loke ta encera “ICT Support”, y tambe ta conta cu un total di 74 graduado. Por ultimo Unidad Economia cu e enfoke riba “Assistant Business Services” tin un total di 64 graduado.
Prome Minister Evelyn Wever-Croes tabata presente na e ceremonia aki, y tabata tin e oportunidad di duna un discurso, na unda el a dirigi su mes na e graduadonan cu un bunita mensahe. El a expresa; cu atendiendo e ceremonianan di graduacion di varios scol, ta yen’e cu emocion, recordando asina tempo su mesun yiunan a gradua, mirando cu ta momentonan importante pa e alumno cu a gradua y pa e mayornan. P’esey pa su persona ta un honor di por ta presente na e ceremonianan aki, na unda e por comparti e bunita momento aki cu cada un di nan.
“Mi ta felicita tur e graduadonan cu e logro grandi aki. Awor boso ta bay drenta den un etapa nobo, na unda boso futuro ta depende di boso mes. Tambe mi ta gradici tur docente cu den tempo bon y malo semper a sa di pone bienestar di nan alumnonan na prome luga. Por ultimo mi ta gradici e mayornan pa a kere den nan yiu, y pa a duna nan e sosten necesario pa nan por a completa nan estudio exitosamente. Nan logro ta boso logro tambe. Aruba mester di futuro profesionalnan, y mirando e cantidad di graduadonan ta yena mi di speransa pa un miho futuro”, Prome Minister a expresa.
