LATAM Airlines ta expande conexion cu Aruba cu mas frecuencia di vuelo  

Cuminsando desde october 2024, LATAM Airlines lo conta cu 5 vuelo semanal 
 
Oranjestad- Cu masha orguyo Aeropuerto di Aruba ta anuncia aerolinea LATAM su decision pa impulsa su servicio directo entre Lima (LIM) y Aruba (AUA), cuminsando desde october 2024. E desaroyo aki ta marca un logro importante pa cu e esfuersonan continuo di Aeropuerto di Aruba pa mehora e conexion y satisface e demanda creciente di biahe pa y for di Latino America. 

Desde su inauguracion, den luna di december di aña 2023, LATAM Airlines a sigui fortalece su compromiso continuamente cu Aruba. Inicialmente ofreciendo tres vuelo semanal riba diahuebs, diasabra y diadomingo, e aerolinea a atende rapidamente cu e demanda y a agrega un di cuater frecuencia riba dialuna cuminsado desde juli di aña 2024. Mirando e desaroyo y fuerte demanda di biahe pa Aruba y e rendimento excepcional di e ruta, LATAM Airlines a anuncia e introduccion di e di cinco vuelo semanal cu lo ta riba diamars, cuminsando den luna di october di e aña aki. E ampliacion di servicio, no ta unicamente fortalece LATAM Airlines su presencia na Aruba pero ademas ta garantisa un experiencia di biahe perfecto pa e pasaheronan. 

Ta premira cu e frecuencianan adicional programa pa juli di 2024 y october di 2024 lo contribui na un capacidad di 1.400 asiento adicional, cu ta traduci na un total di 3.480 asiento pa luna di october 2024. Ya caba region di Latino America a mira un crecemento pa 2024, cu un capacidad di asiento cu a expande un total di 43% y e factornan di ocupacion a aumenta 2.3 punto te cu mei 2024, den comparacion cu e mesun periodo di aña pasa.  

“Esaki ta fungi como un confirmacion di e confiansa continuo cu LATAM Airlines tin den Aeropuerto di Aruba como un socio strategico”, asina Jo-Anne Meaux-Arends, Aviation Business Development Executive na Aeropuerto di Aruba a expresa. El a continua bisando cu: “Nos ta masha entusiasma cu e expansion aki, cu ta posiciona perfectamente cu nos obhetivo pa fomenta e crecemento den e mercado Latino Americano y establece rutanan nobo denter di e red extenso cu LATAM tin pa ofrece. Esaki ta demostra e compromiso comparti di brinda e biaheronan conexionnan cu ta cumbini nan y un experiencia di biahe excepcional.” 

Detaye di vuelo 

E ampliacion di e ruta Lima-Aruba lo opera cinco biaha pa siman riba dialuna, diamars, diahuebs, diasabra y diadomingo, haciendo uzo di un avion A320 cu 174 asiento. Ademas di e servicio directo pa Lima, e biaheronan lo conta cu un conexion sin problema na e red amplio di LATAM, cu ta inclui destino na Argentina, Brasil, Chile, Paraguay y Uruguay, di e manera aki enrikeciendo su opcionnan di biahe den henter Latino America.  

Ruta	Ora di salida	Ora di yegada
AUA-LIM	6:45 PM	9:40 PM
LIM-AUA	12:00 PM	5:05 PM

Tocante Lima 

Lima, e capital vibrante di Perú, ta cuater ora leu di Aruba. E ciudad ta famoso pa su patrimonio cultural, arkitectura historico y experiencia culinario. Como gateway pa Perú, Lima ta ofrece un combinacion unico di modernisacion y tradicion, invitando tur e biaheronan pa explora su maraviyanan, su mercadonan y su beyesa di costa. 

Tocante LATAM 

LATAM Airlines, ta un aerolinea clave den e industria di aviacion, ta reconoci pa su compromiso den brinda servicio top-notch y un conexion amplio rond henter e continente Americano. Cu un red amplio cu ta conecta bo cu un cantidad di pais, LATAM ta reconoci pa facilita e experiencia di biahe, garantisando cu e pasaheronan tin acceso na un variedad di destinacion paden y pafo di Sur America. E aerolinea ta conecta su pasaheronan na diferente destinacion interesante manera Argentina, Brasil, Bolivia, Chile, Colombia, Ecuador, Paraguay y Uruguay.