Gift of Sports y Gift of Education di Paseo Herencia

Oranjestad – Paseo Herencia ta continua cu dos iniciativa cu ta diseña pa yuda y inspira hobennan talentoso di nos isla: e programanan Gift of Education y Gift of Sports. Como un organisacion cu ta enfoca riba comunidad, Paseo Herencia ta compromete pa stimula e potencial di nos hobennan y duna nan poder pa sobresali den nan deporte y estudio.

Gift of Sports
Gift of Sports ta un programa diseña pa sostene atletanan hoben, di 12 aña di edad bay ariba, pa sobresali den nan deporte. Paseo Herencia ta reconoce e dedicacion y pasion cu atletanan ta pone den nan training y competencia. Atraves di e programa aki, Paseo ta otorga un sponsorship pa competencianan internacional, ofreciendo asistencia financiero pa cubri gastonan relaciona cu participacion den competencianan prestigioso. Esaki tin e meta di habri portanan di oportunidad, permitiendo atletanan pa competi na un nivel mundial y gana experiencianan valioso cu lo forma nan carera den deporte.

Gift of Education
Paseo Herencia ta reconoce cu educacion ta hunga un rol crucial cual ta forma e futuro di nos hobennan y nos sociedad. Hopi studiante talentoso tin e ambicion y potencial pa sobresali academicamente, pero nan por topa barera financiero cu ta stroba nan progreso. Por medio di e programa, Gift of Education, Paseo ta duna asistencia financiero na studiante talentoso, yudando cu gastonan di scol. Pa kita peso financiero for di nan lomba, e programa ta duna poder na e hobennan pa enfoca riba nan estudio y demonstra nan potencial. E vision ta pa crea e caminda pa e studiantenan aki por briya academicamente y logra nan aspiracionnan educativo. Paseo Herencia a cuminsa cu e programa aki 9 aña pasa, dunando ayudo na 10 studiante tur aña.
Proceso di Aplicacion
Pa esnan cu ta desea di aplica, sea ta e studiante of e voogd, mester entrega un carta di motivacion cu ta papia tocante nan ambicion academico, aspiracionnan y mester splica dicon nan ta merece pa wordo escogi pa e programa aki. Por ultimo, mester inclui un copia di e hoben su ultimo rapport di scol pa demonstra nan dedicacion na nan estudio, y yena un formulario di aplicacion cu ta disponibel riba Paseo Herencia su website www.paseoherencia.com of por busca un copia fisico cual ta disponibel na oficina di Paseo Herencia.

Gift of Education & Sports USA Edition
Pa 2024 Paseo a amplia e programa di Gift of Education and Sports cu un edicion special pa studiante atletanan cu ta bay studia na merca. E edicion aki ta dirigi specificamente riba studiantenan ku ta combina nan educacion cu un pasion pa deporte. Paseo lo ta yudando studiante-atletanan ku un donashon di $1000, dirigi pa cubri gastonan di skol na Merca. E iniciativa aki ta refleha Paseo su dedicacion na apoya hobennan pa sigui nan soño nan den estudio y deporte. Pa aplica pa e programa aki, ta invita studiantenan interesa pa entrega un carta di motivacion caminda ta describi nan ambicion academico, CV cu ta destaca nan logronan deportivo i karta di aceptacion y manda esaki via email na marketing@paseoherencia.com.
Aplicacionnan pa ambos programa ta habri te cu 31 di juli 2024.
Aplica awe mes! Paseo Herencia ta kere den inverti den e soño di nos hobennan pa un futuro mas briyante. Dor di sostene atletanan hoben atraves di e Gift of Sports, y studiantenan talentoso atraves di e Gift of Education, Paseo Herencia ta aspira pa forma un miho mañan pa nos comunidad local.