Djiespie’s Place Pa 35 Aña e Refresqueria di Pueblo

Tabata 35 aña pasa cu Aloysio Franken, mihor conoci como Dijespie a dicidi d
tuma un reto nobo den su bida. E no a haci esaki sin consulta cu su famia, pa
cual mester reconoce e dicho: “Tras di tur hombre exitoso, tin un muher para”.
Pero Dijespie a consulta cu su señora Cecilia, pero tambe cu su cuña Rita, y
hunto nan a tuma e decision di tuma over operacion di Refresqueria di Zepp
Wever dia 31 di juli 1989,
Decision tabata pa tuma e operacion pa 10 aña so, pero cu awor, nan ta
cumpliendo 35 aña den e lugar, cu a haya nomber di “Djiespie’s” , Dijespie’s a
para bira un negoshi di famia.
HISTORIA
Un poco di e historia, con awe e negoshi aki di Ref. di Zepp Wever a bira
Djiespie’s. Djiespie tabata traha na Amigoe di Aruba cu tabata keda tegenover
di Ref. Zepp Wever. Tur atardi ora cu Djiespie caba cu trabao, e tabata bai
serca Zepp y su yiu Chonay pa papia di kico a pasa durante dia. Y momento
cu Zepp mester di yudanza, tabata Djiespie tabata yud’e e.o. pa bai busca un
difunto etc.
Despues cu Zepp a fayece, su yiu, Chonay a laga sa cu e no por maneha e
negoshi, mirando e trabao cu e tabatin y el a bisa Djiespie pa yud’e busca un
persona pa tuma over Ref. di Zepp. Djiespie a dicidi di consulta cu su señora,
Cecilia y tambe a consulta su cuña Rita y asina hunto a dicidi pa tuma e
operacion pa 10 aña so.
Manera menciona anteriormente, tabata un dia 31 di juli na 1989, a haci e
transaccion, net algun dia despues cu Djiespie su cumpleaños. Asina
Djiespie, Rita, Lucia, y Cecilia, a cuminsa cu e negoshi “My Corner Take
Away”, cu te nomber oficial, pero e nomber comercial a bira “Djiespie’s”.
A lo largo Djiespie a bira malo, cu a haci cu su yiunan, Suzy, Setty y Pipi a tuma
over y hunto nan a bin ta maneha Djiespie’s te cu awe hunto cu nan primanan,
Lucia y Diana.
Djiespie’s fuera ta conoci pa nan pan cu hotdog, jiuce di tamarijn, nan dushi
pasteshi, y sin falta nan famoso ijcream di mispel, a haci e negoshi famoso pa
grandi y chiquito. Djiespie’s tabata habri for di 6 ‘or di mainta pa 6’or di atardi.
HAPPY HOUR
Etty Toppenberg, amigo di famia Franken y den consulta cu en especial Setty a
bin cu e briyante idea pa diabierne atardi, Etty Toppenberg bin cu su guitara pa
entretene e clientela. Hopi bon idea, pa cual Etty Toppenberg a pidi Toko
Winklaar pa percura pa promociona e Happy Hour di tur diabierne atardi den
su noticiero radial, cu a para bira te 8 pa 9’or di anochi. Y asina e negoshi por a
bende mas y recupera e parti economico, cu a cuminsa cai, debi na e.o. e
tram, reconstruccion di Caya Betico Croes.
Etty Toppenberg a cuminsa su so, pero poco-poco el a haya su amigonan
musico cune, y a grupo a bira Etty y su Amigonan, y asina a cuminsa cu
bailamento te 10’or di aochi. Esaki tabata un atraccion unico di Djiespie’s su
Happy Hour, unda un cantidad di siguidornan di Etty Toppenberg, asisti pa su
casa Corma, a bin ta percura p’e instrumentonan y set-up di e sistema pa tur
diabierne atardi, cu a haci e Happy Hour aki algo unico te awe.
Maske hopi ta bisa e ta un Happy Hour pa nos grandinan so, no ta berdad.
Hecho ta cu nos grandinan, nos adultonan mayor porfin a haya un sitio pa nan
por bai y disfruta di bida, manera tabata deseo di Djiespie y Etty y su
Amigonan.
Djiespie a bin fayece, pero Etty a bisa cu e lo sigui cu e Happy Hour te dia cu
Todopoderoso tambe a yame den su Reino. Loke Etty tabata haci, a sali for di
su curazon. Ta dificil pa termina loke nos adultonan mayor ta gusta y asina e
yiunan di Djiespie a sigui cu musica baialable tur diabierne cu a haci
Djiespie’s mas famoso ainda.
Dia 2 di augustus awor famia Franken a dicidi di conmemora e 35 añanan aki
di Djiespie’s, cu lo tey pa hopi aña mas, siguiendo cu nan legado crea di stima
tur hende y pa sigui percura pa nan bon servicio cu Djiespie’s a bira famoso
p’e.
Djiespie’s ta invita henter pueblo, cu a sa di sostene nan tur e 35 añanan aki y
pesey famia Franken tin un evento diabierne awor 2 di augustus di 7’or te cu
11’or di anochi, cu nan bandanan, Nos cu Nos, Songo Music y Robert
Maduro y su Azucar Band pa celebra loke a bira Happy Hour di tur
diabierna na Djiespie’s.