Travel

Aruba Airport Authority N.V. ta anuncia Team di Maneho Interino memey di un reahustacion strategico

Oranjestad- Aruba Airport Authority N.V. (AAA), manehado y operado di Aeropuerto di Aruba, ta contento di anuncia e nombramento di un Interim Management Team/ Team di Maneho Interino pa guia e compania den e alineacion strategico cu ta andando. E decision aki, vigente desde dia 1 di augustus 2024, ta refleha e compromiso di AAA y Royal Schiphol Group (RSG) pa mantene stabilidad operacional y busca crecemento a largo plaso.

E nombramento di tres lider interino, en bes di un solo CEO interino, ta pa garantisa un structura di liderazgo balansa y efectivo durante e periodo di transicion aki. E decision aki ta surgi for di e acuerdo strategico di colaboracion cu AAA tin cu RSG, den cual RSG ta asigna un CEO pa AAA y ta nombra pa Gobierno di Aruba como e unico accionista di AAA. Como cu e periodo di e CEO actual a termina dia 31 di juli 2024 y cu diferente negociacion continuo pa un acuerdo nobo di colaboracion strategico restructura, a considera necesario pa implementa un Interim Management solido. E structura aki ta permiti pa e team cu experiencia diverso guia e compania a traves di e fase aki.

Advertisements

E Team di Maneho Interino ta consisti di:

  • Aisha Anthony, Chief Financial Officer, cu mas di 15 aña di experiencia den e strategia financiero di AAA. 
  • Jurgen Benschop, Chief Operations Officers, conoci pa su trayectoria amplio di mas cu 26 aña den operacion di aeropuerto na AAA.
  • Barbara Brown, Chief Revenue Development & Communications Officer, cu mas di 27 aña di experiencia den e maneho di comercial di aeropuerto na AAA.

Hunto, e lidernan aki lo garantisa e continuidad y stabilidad mientras ta hiba e iniciativanan clave padilanti.

E buskeda pa un CEO nobo ta rekeri di atencion cauteloso pa haya e candidato corecto cu por dirigi e organisacion. Tanto RSG como Supervisory Board of Directors (BOSD) di AAA ta comprometi cu e proceso riguroso aki y ta trahando diligentemente pa haya e miho persona pa asumi e funcion. Aunke cu no por duna un tempo specifico riba ki dia lo tin un CEO nobo, BOSD di AAA, RSG y e Team di Maneho Interino ta dedica pa finalisa e nombramento mas pronto cu ta posibel.

E Team di Maneho Interino, den colaboracion cu BOSD y su accionistanan, lo enfoca riba diferente prioridad clave, incluyendo e comunicacion continuo, e siguiente DCAA Audit Certification, planificacion presupuestario, implementacion di e contract relaciona cu Fase 1B di e proyecto Gateway 2030, evaluacion y baloracion strategico, supervision di rendimento y e operacionnan diario.

“Nos ta sigur den e habilidad di e Team di Maneho Interino pa lidera AAA den e fase transitorio aki. Nan experticio en comun lo ta esencial mientras cu nos ta pasa door di e cambio”, asina Gerald Tsu, Presidente di Board of Supervisory Directors of AAA, a expresa.

“Tur miembro di e Team di Maneho Interino tin experiencia amplio den e rolnan di liderazgo na aeropuerto y basa riba nos relacion largo cu nan y cu henter e team di AAA nos ta sigur cu nan lo por dirigi AAA cu exito den e fase interino aki”, tabata palabra di Kjell Kloosterziel kende ta director di Schiphol International.

“Pa nos e ta un honor pa asumi e rol aki den un momento asina crucial. Cu e sosten y e compromiso di e team talentoso di AAA, nos ta compromete pa impulsa nos metanan strategico y garantisa stabilidad”, asina e Team di Maneho Interino di AAA a expresa.