Fundacion Elsa Coffi tocante matrimonio di mesun sexo

Fundacion Elsa Coffi a organiza na diferente ocasion un conferencia tocante derechonan igual. Na juli 2023 tabata e ultimo actividad, esta presentacion di un buki di mr. Ernesto Rostenstand na Biblioteca Nacional tocante e simposio cu Fundacion Esla Coffi a organiza titula “From slave marriage to gay marriage”.

Mescos cu slave marriage tabata un realidad, aworaki a bira un realidad tambe na nos islanan gay marriage. Diasabra ultimo a tuma lugar e prome matrimonio di mesun sexo na Corsow, después di e veredicto di Corte di Casación na Den Haag.         

Na Aruba tin algun político ainda ta purba di bruha tera, haciendo promesa falso cu nan si lo bai elimina e ley aki. Rycon Do Nascimento, parlamentario independiente, Marco Berlis di fraccion di MEP, partido Curpa ta pretende cu nan por draai bek historia. Loke nan no ta bisa ta cu e unico manera pa elimina e gay marriage ta pa Aruba bira independiente, entrega e paspoort hulandes y sali for di Reino hulandes. Mientras cu nos keda den Reino hulandes gay marriage ta un hecho despues di e veredicto di casacion.

E sistema legal hulandes ta basa riba separacion Iglesia y Estado. Pa ley hulandes  y pues di Aruba matrimonio ta concerni solamente algo civil (artikel 1:30 BW). Opinion religioso tocante matrimonio huridicamente no ta relevante pa e jueznan di Casacion. Y no por privilegia un grupo religioso a costa di otro, nos Constitucion di Aruba articulo 1.1. ta masha cla den esei. 

 E trias politica, es decir e separación di podernan, a desaroya den un sistema di “checks and balances”, den cua e poder judicial tin un tarea di guía huridico, bao di cierto condicionnan. Un di e condicionnan ta cu ora tin violacion di derechonan humano e di tres poder tin cu actua. Y esaki ta e caso, esta discriminacion di ciudadano.

Corte Europeo correctamente a indica cu matrimonio no ta un derecho humano of fundamental. Si e tabata un “grondrecht”, e ora gobierno tin e obligación di zorg cu tur ciudadano mester casa, loke ta algo ridiculo. Un derecho fundamental ke men cu un gobierno mester cumpli cu ne.

Un matrimonio civil ta un contract entre dos persona. Un homber y un hende muher si por sera e contract aki, pero dos hende muher no por será e contract aki. Esaki ta discrminacion, pasobra tur ta mesun hende. Esei ta e esencia di e veredicto di Casacion, nos tur ta hende y no por tin discriminacion, cu tal hende si mag sera un contract y e otro no. Nan ta mesun hende toch?

Do Nascimento ta reconose cu un matrimonio ta un contract cu ta trese beneficionan legal y un di e beneficionan ta e pensioen di vejez. Do Nascimento sin embargo no ta splica dicon un hende homber cu un hende muher si por ofrese otro e beneficio aki, pero dos hende muher of dos hende hombre no. Si dos hende ta cumpli cu e condicionnan di por casa, esta ta mayor di edad y ta capaz pa tuma decision, debidamente controla pa e funcionario publico di Censo, no por stroba cierto hende di casa y otro no, esaki ta discriminacion.

Hasta si e politiconan aki elimina e articulo di discrminacion for di nos Constitucion, toch Aruba lo ta mara na tratadonan internacional. E unico solucion pa e politiconan aki lo ta pa Aruba sali for di Reino hulandes y kibra cu tratadonan internacional. Esei nan no ta bisa, pasobra e ora nan lo no haya niun voto, y juist nan ta hasi promesa falso pasobra ta voto nan kier.