FORUM TRAFICO SIGUR

Uzo di Celular den trafico, un problema grandi

Nos Celebro no ta diseña pa Multi-task, bo ta peligra bo bida y di otronan

Oranjestad, 15 di Augustus, 2024 – Diamars anochi na TeleAruba un biaha mas tabata tin e programa Forum-Trafico Sigur den cual panelistanan a elabora riba varios topico importante di trafico na Aruba. Panelistanan invita tabata Sra Liliana Rasmijn Vocero Interino di Korps Politie Aruba (KPA), Sr Francis Quandt di DTI, Psicologo Sra Rochelin de Cuba y Sra. Gwendoline Henriquez – Representante di association di companianan di seguro.

Un di topiconan cu a hala mas atencion tabata uzo di Telefon Celular den trafico, vocero policial interino Liliana Rasmijn a describi con grandi e problema aki ta en berdad. “Awendia tin hende asina custuma cu e uzo di telefon cu nan no ta realisa cu ta pa es motibo polis ta parando nan.” Sra Liliana a duna como ehempel un caso cu e la presencia caminda cu nan a para un señora  pa motibo di uzo di telefon mientras e ta core auto y mientras e persona ta interactuando cu polis e ta sigui atende cu su telefon manera cu nada no a pasa. 

 Segun Sra. Liliana a sigui elabora: Mayoria biaha caminda autonan ta boks tras di otro, e accidentenan aki ta sosode pasobra e atencion di e automobilista ta den e celular. “Si bo pasa un rij di auto na e banda contrario, bo por ripara cu 9 di cada 10 persona nan cara ta abou paso nan ta wak den nan celular.”

Psicologo Rocheline de Cuba a splica con serio y peligroso e uzo di telefon den trafico ta pa tanto e manehado y otronan den trafico. Tin hopi factornan cu ta haci cu un persona ta dicidi di uza su telefon ora di core auto.  Un di nan ta e pensamento cu e person por multi-task. Segun Psicologo Sra. de Cuba, Multi-tasking ta un mito. No ta demostra (cientificamente) cu un persona por ‘multi-task’ mucho MENOS den trafico. Den trafico un persona ta haci uzo di su atencion selectivo y no por wordo distrai pa otro ‘incentivonan’.  Mucho cambio di cierto parti di e celebro ta garantisa cu e persona ta bay haci un error, grandi of chikito, pero den trafico e por ta fatal.

FOMO y FOBO, esta ‘Fear of Missing Out’ y Fear of Better Offer’  ta terminonan cu awendia ta wordo uza pa describi e necesidad cu un persona tin pa semper ta na altura di tur cos. E mundo digital cu nos ta bibando aden ta haci facil pa personanan keda den contact cu otro pero alaves dificil pa desconecta un rato for di telefon door di e gratificacion instante cu e persona ta ricibi di e telefon.

Sr Francis Quandt di DTI a añadi y splica e riesgo cu ta surgi ora ta core cu telefon den man.  “Un persona cu ta coriendo na un speed di 45 pa 50 km pa ora,  y e ta  lesa of  manda un mensahe ta pasa entre 4.6 pa 5 seconde cu e no ta pone atencion di loke ta pasa rond. Esaki ta ekivalente na core mita veld di voetbal sin a pone atencion den trafico. Coriendo na 85 pa 90 km ta full un veld di voetbal su grandura un automobilista por a core sin a pone atencion den trafico” Ta hopi cos por pasa den un par di seconde.

Comision Trafico Sigur ta invita televidentenan pa keda pediente pa e siguiente programa. Otro luna lo tin e di cuater programa di Forum Trafico Sigur den cual lo sigui trece mas informacion di topiconan crucial pa siguridad den trafico. Si bo persona tin cualkier pregunta pa expertonan di trafico, por mandanan via e website www.traficosigur.com of via email na info@traficosigur.aw.  Salba Bida, Scoge pa Siguridad.