Candidato di AVP, Wendrick Cicilia: Evelyn Wever-Croes no por papia di eleccion na Venezuela ignorando e balki na Aruba

E candidato hoben di Partido di Pueblo Arubano AVP a califica e expresionnan reciente di Prome Minister Wever-Croes tocante resultado di eleccion presidencial na Venezuela como hipocrita. E ta basa su mes riba e accion cu e mandatario a tuma tres aña pasa cu a permiti un nubia di duda keda riba e proceso electoral na Aruba.

Cicilia a expresa su sentimento y di e partido pa solidaridad, convivencia y empatia cu e comunidad Venezolano; no solamente na Venezuela y Aruba, pero rond mundo. Simultaneamente, ta un momento hopi inspirativo pa nos cu tambe ta buscando un cambio; un realidad diferente y posibel solamente si nos uni forsa pa logra e cambio politico cu nos ta desea pa nos pais.

“Nos sa cu na 2021, e ultimo eleccion a laga un sabor sumamente amargo atras cerca esunnan den nos comunidad cu ta sinti cu esaki no a wordo conta na e manera corecto. Pa e motibo ey Fraccion di AVP a presenta cierto cambio di ley electoral na Aruba pa percura cu tin mas transparencia, mientras cu Premier Wever-Croes ta insisti den nenga di acepta e iregularidad cu a sosode,” asina e candidato hoben a comenta. Como hurista, el a aporta na e elaboracion di propuesta pa amienda.

Eleccion 2021 tabatin hopi iregularidad; no solamente den conteo, pero tambe reparticion. A nenga reconteo y a kima e stembiljet prome cu proceso legal a termina. Tur esaki a mina e confiansa den e proceso. Awo Wever-Croes kier bisa cu no tabatin proposicion di partido den parlamento pa cambio di e landsverordening kiesverordening.

Realidad ta MEP/RAIZ a rechasa e propuesta di AVP pa mayor transparencia, pero e coalicion si a aproba pa partido politico no ricibi mas e kiesregister cu ta e nomber di esunnan cu ta tin derecho di voto. Describiendo e den termino di weganan olimpico, Cicilia ta considera Evelyn Wever-Croes como un campeon cu medaya di oro den loke ta comparti mentira cu pueblo.

Cicilia a splica cu proceso electoral rond mundo, sea ta Hulanda of Venezuela, ta warda e stembiljeten pa un minimo di tres luna den caso cu presenta un disputa. “Ni Nicolas Maduro na Venezuela a kima e actanan manera Evelyn Wever-Croes a haci na Aruba. A kima e stembiljet prome cu hues a duna un veredicto, si por haci reconteo of no. Tur esaki ta aspecto hopi lamentabel y cu mester trece cambio fundamental.” E pura cu tabatin despues di eleccion pa kima e stembilijet ta laga un holo desagradabel den esunnan cu ta participa den e proceso democratico.

Otro amienda cu AVP a presenta tabata pa un reconteo automatico ora cu tin un diferencia chikito entre dos partido. Na 2021, pa apenas 50 voto, e reparticion di asiento y cu esey e destino di e pais por tabata completamente diferente. Na Merca, por ehempel, 27 di e 48 estado na Merca ta ofrece un reconteo automatico ora tin un diferencia chikito y 43 di nan ora cu tin un peticion di un partido. Esaki, entre otro, ta loke ta garantisa un proceso limpi, transparente y obhetivo.

Cicilia: “Laga loke ta pasando na Venezuela ta un les pa nos; pa na Aruba nos ta vigilante. Pasobra cambio den ley ta fundamental, pero nos participacion activo tambe ta clave. Evelyn Wever-Croes ya caba a canta victoria prome cu tempo, pero mi ta kere cu e comunidad lo ta bay tin un mensahe distinto pa esunnan cu ta den e gobierno aki. E resultado ta bay ta asina abrumador, cu Aruba ta bay scoge un rumbo y realidad distinto.”

E propuesta di cambio den kiesverordening ta ilustra e caracter proactivo cu semper AVP tin, esta di bin cu solucion y mehoracion caminda cu ta necesario na bienestar di e ciudadano. Den e caso aki pa tin un sistema electoral transparente. Mescos cu na Venezuela, otro ana Aruba ta bay tin mester di un accion nacional cu lo yama Dia di Victoria pa ta presente na cada mesa di votacion vigilando, protehando e votonan.