Lider di Fraccion, mr. Mike Eman : AUMENTO DI 50% DI PESIOEN TA UN COMPROMISO !

Durante un conferencia di prensa, lider di Partido di Pueblo Aruba AVP, mr. Mike Eman a pone den contexto, atrobe, e realidad tristo cu Gabinete Wever-Croes tin e pueblo Arubano pasando aden, specialmente nos grandinan.

“Nos ta bibando momento di hopi urgencia den nos comunidad. Tras di otro ta haya sla y tur dia nos ta bira mas preoucupa di mira cu pobresa den nos pais ta creciendo. Nos ta mira un gobierno cu continuamente ta pone costo di bida aumenta dramaticamente. Tur cos cu nos ciudadano mester pa biba y comparti cu famia a bira mas caro,” Eman a expresa.

E realidad ta cu na 2017, ora gobernacion di AVP a cera, cifranan di CBS ta mustra cu un persona tabatin mester di 2.097 florin pa cubri su necesidad basico. Awendia, despues di casi ocho aña di Gabinete Wever-Croes, e cifra ey a bira 2.601 florin; un aumento di casi 500 florin pa luna. Raad van Advies mes ta indica cu esaki ta e diferencia mas grandi cu a yega di mira na Aruba, entre bestaansminimum y e salario minimo. E pensionado soltero cu ta 1.100 florin so e ta haya, Evelyn Wever-Croes tin e curashi di bisa cu ta bay dun’e 30 florin mas, mientras cu a kita 500 florin for di su poder di compra pa luna.

Ora AVP a haci un analisis di kico ta e reto di mas grandi cu Aruba ta enfrenta, por a mira den cada hogar cu a bishita y famia cu a papia cu ne, e dolor di pobresa y perdida di poder di compra ta destaca. P’esey mes a bin cu un programa di 10 punto pa combati costo di bida y duna pueblo un alivio. E plan ey ta inclui un aumento di pensioen di minimo 50%. Y anticipando resistencia di Gabinete Wever-Croes pa cu esaki, a propone pa e fondo no sali di SVB, pero como reparatietoeslag. E punto aki pa nos no ta un promesa, pero un compromiso, mr. Mike Eman a envatisa.

Por mira cu Gabinete Wever-Croes tin 500 miyon florin mas di entrada tur anja compara cu Gabinete Mike Eman. Gabinete Wever Croes a ranca e miyonesnan aki for di saco di pueblo cu medida. Pero ni asina ta dispuesto pa yuda e pueblo. Loke e gobierno actual a haci, ta presiona SVB pa bin dilanti y contradeci e idea di aumento di pensioen. Esaki ta e mesun tipo di resistencia cu Nelson Oduber a duna Henny Eman hopi aña pasa ora AVP kier a redobla pension. Y ta danki na persistencia di Henny Eman e pensioen a worde redobla. Atrobe AVP a prepara pa realisa e aumento pa pensionadonan y nos lo hacie cu un aumento substancial di reparatietoeslag cu ta Sali for di caha di gobierno y no di SVB.

E aumento aki cu por lo menos 600 pa 800 florin pa luna lo conta tambe pa esnan cu un salario minimo te cu esnan cu Afl. 3500,==. E “grens” tabata Afl. 2500,== tempo cu nos a introduci reparatietoeslag, pero cos a bira hopi caro y esnan te cu 3500 tambe ta pasando dificil, pesey e reparatietoeslag den un “gliding scale” lo conta pa nan tambe. Esan cu ta promer den tabel ta haya 100% toeslag y esnan cu entrada mas halto lo haya 50%. E reparatietoeslag cu AVP tin den su punto lo ta entre 600 pa 800 florin y esaki lo bin pa cada pensionado 100% y empleado dentro di e sacala menciona, Eman ta envatisa.